“Son oyunlarda “Bakı” yaxşı təsir bağışlayır. Hiss olunur ki, yeni gələn baş məşqçi öz sistemini “otuzdurmağa” çalışır. Bu qazanılan son nəticələrdə də özünü göstərir”.
Korner.az-ın məlumatına görə, bu sözləri Ağdamın “Qarabağ” klubunun futbolçusu Vaqif Cavadov deyib.
O, klubun rəsmi saytına açıqlamasında Topaz Premyer Liqasının XVII turunun “Bakı” ilə oyunu haqda fikirlərini açıqlayıb: “Amma biz də pis vəziyyətdə deyilik. Hazırda ilk pilləni bölüşdürürük. Qazanacağımız 3 xal bizə çox lazımdır. Qış fasiləsinə nikbin yollanmaq istəyirik. “Bakı”nın meydançası yaxşı vəziyyətdədir. Bu da hər 2 tərəfin yaxşı futbol göstərməsinə imkan yaradacaq. “Bakı”yla oyunlarımız hər zaman gərgin alınır. Ötən mövsüm həm çempionatda, həm də kubokda “zolaqlılar”a məğlub olmaqla avrokuboklardan kənarda qaldıq. Elə ilk dövrədəki oyun da maraqlı keçmişdi”.
Cavadov bildirib ki, ümumiyyətlə, cari birincilikdə hər qələbənin qiyməti çox böyükdür: “Qazanılacaq 1 xalın belə əhəmiyyəti hiss olunur. Belə baxanda vəziyyətimiz pis deyil. Düzdür, bəzi oyunlara baxanda fikirləşirsən ki, daha çox xal toplaya bilərdik. Amma bütün komandaların gücləndiyini və hamının xal itirdiyini görəndə şikayətlənməyə haqqımızın olmadığını görürəm. Qışa kimi “Xəzər-Lənkəran”la da vacib görüşə çıxacağıq. Amma indi ancaq “Bakı”yla oyuna köklənmişik”.
