UEFA-nın İcraiyyə Komitəsi gələn ayın 6-da qurumun prezidenti Mişel Platinin təşəbbüsü ilə 2020-ci ildə təşkil olunacaq Avropa çempionatının bir və ya iki ölkədə keçirilməsi praktikasından imtina məsələsini müzakirəyə çıxaracaq.
Korner.az-ın məlumatına görə, qitə futbol qurumunun rəhbəri AÇ-2020-ni konkret bir və ya iki ölkəyə tapşırmayıb, oyunların bütün Avropa ərazisində, müxtəlif şəhərlərdə təşkil etmək fikrindədir.
Mişel Platininin planına uyğun olaraq, hər biri 4 komandadan ibarət 6 qrupun oyunları Avropanın 12 şəhərində oynanılacaq. Bu mərhələni adlayanlar görüşlərini yenidən müxtəlif ölkələrdə keçirəcəklər. Yalnız yarımfinal və final matçı bir ölkənin iki fərqli şəhərində oynanılacaq.
Xatırladaq ki, Azərbaycan bu il Gürcüstanla birgə AÇ-2020-ni təşkil etməyə namizədliyini irəli sürüb.