“Xəzər Lənkəran” klubunun baş məşqçisi Con Benjamin Toşak Avroliqanın I təsnifat mərhələsi ilk oyunu çərçivəsində “Slima” ilə keçirilən görüş haqda danışıb.
Korner.az-ın məlumatına görə, klubun rəsmi saytına açıqlama verən Toşak komandanın ilk oyundakı uğursuzluğunda özünün də səhvi olduğunu etiraf edib:
“Matçdan sonra mətbuat konfransının keçirilməməsi səbəbindən fikirilərimi çatdıra bilməmişdim. Qeyd edim ki, ilk oyunun vaxtının iki gün qabağa salınması, bizim hazırlıq planlarımızın pozulması,keyfiyyətsiz süni örtükdə oyunun keçirilməsi bizim oyunumuza çox təsir etdi. Biz bir yoxlama oyunundan imtina etdik və gecə yarısı Maltaya yola düşməli olduq. Bütün bunlar istənilən halda komandaya təsir edir.
Əks düşərgədə isə vəziyyət fərqlidir. Onlar rahat şəkildə hazırlaşıb, motivasiya olunub bizi gözləyirdilər. Bu yerdə qeyd edim ki, mənim də səhvlərim olub və bunu etiraf etməklə yanaşı vurğulamaq istərdim ki, bütün məsuliyyət mənim üzərimdədir. Komandamın oyunundan razı qalmasam belə futbolçuları qınamaq istəməzdim. Ümid edirəm bir daha belə səhvlər olmaz. Hazırda zədəli futbolçularımız var və onların komanda ilə birgə məşq edə bilməməsi bizə əlavə problem yaradır. Bununla belə inanıram ki, doğma meydanda, normal qazonda və güclü azarkeş dəstəyi ilə biz istədiyimizə nail olacağıq”.
Qeyd edək ki, “Slima” – “Xəzər Lənkəran” oyunu 1:1 hesabı ilə nəticələnmişdi. Bu komandalar arasında cavab görüşü iyulun 11-də, Lənkəranda, saat 20:00-da baş tutacaq.
