“Xəzər Lənkəran”ın baş məşqçisi Con Toşak Avropa Liqasında qalib heyəti dəyişməyəcək. Uelsli mütəxəssis II təsnifat mərhələsində “Makkabi” ilə bu gün Hayfada keçirəcəkləri oyunda öncəki matçda meydana buraxdığı start heyətinə güvənmək fikrindədir.
Korner.az-ın apasport.az-a istinadən verdiyi məlumata görə, “ağ-yaşıllar” mübarizəyə evdə Maltanın “Slima” klubuna 1:0 hesabı ilə qalib gəldiyi 11 futbolçu ilə başlayacaq. Toni Doblas qapıda, Rasim Ramaldanovla Adrian Skarlatake müdafiənin mərkəzində yerini tutacaq. Radomir Todorov müdafiənin sol, Eder Bonfim sağ cinahında yer alacaq. Hərçənd, Elnur Allahverdiyevin cəzası bitsə də, müdafiənin sağ cinahında yenə Bonfimin oynamağı gözlənilir.
Kapitan Rahid Əmirquliyevlə Nikola Qliqorov dayaq yarımmüdafiəçiləri funksiyasını yerinə yetirəcəklər. Marin Orsuliç də mərkəz yarımmüdafiəçisi olsa da, sol cinaha meylli oynayacaq. Sadio Tounkara isə yarımmüdafiənin sağ cinahında çıxış edəcək. AZAL-dan gələn Zohair Benouahi ilə Junior Nildo yenə ön xətdə yer alacaqlar. Zohair oyun qurucusu kimi tək hücumçu Nildonu topla təchiz edəcək.
