Çempionlar Liqasının qrup mərhələsinin ilk turunda “Real”a 1:6 hesabıyla uduzan “Qalatasaray”ın baş məşqçisi Fatih Terim məğlubiyyətin təbii olduğunu deyib.
Korner.az-ın məlumatına görə, “İmperator” komandasının oyuna çox yaxşı başladığını, ancaq nəzarəti bir anlıq əldən buraxmaqla qollar buraxdıqlarını bildirib.
“3 xal itirdik, özü də ağır şəkildə itirdik. Rəqib ilk qolu vurana qədər bir dənə də olsun qol epizodu yarada bilməmişdi. Həmişə deyirəm: bu cür oyunlarda bir saniyə, hətta bir salisə belə, konsentrasiyanı itirmək olmaz. İkinci yarıya da yaxşı başladıq. Amma yenə səhvlər və qollar buraxdıq, sonrası da məlumdu… “Real” qarşısında bunları edirsinizsə, toparlana bilməzsiniz. Hətta yaxşı qurtulduq, hesab daha böyük ola bilərdi. Məğlubiyyətə görə üzr istəyirəm. Bütün qəbahət məndədi”, – deyə Terim söyləyib.