“Neftçi” klubunda hazırda işlərin qəliz getməsiylə bağlı xəbər vermişdik. İş ondadır ki, Belçikalı futbolçu Emil Mpenzaya görə FİFA bu komandaya ciddi xəbərdarlıq edib. Bunun da nəticəsində “Neftçi” Mpenzaya 800 min dollara yaxın pul ödəməlidir.
Korner.az-ın məlumatına görə, bu məsələylə bağlı ötən gün “Neftçi” Müşahidə Şurasının iclası keçirilib.
İclasa Müşahidə Şurasının rəhbəri Çingiz Abdullayevin rəhbərlik edib. Olayla bağlı klubun son prezidenti Sadıq Sadıqovun fikirlərini öyrənən Abdullayev bununla bağlı müzakirələr aparıb. Klubun icraçı direktoru Elnur Məmmədov isə bu işdə günahkar qismində keçmiş vitse-prezident Tahir Süleymanovu göstərib. Bununla razılaşmayan Sadıq Sadıqov Tahir müəllimin də iclasa qatılmasını istəyib. Müşahidə Şurasının sədri Çingiz Abdullayev də bunu dəstəkləyib və Süleymanov iclasa qatılıb.
Elnur Məmmədovun iradlarıyla razılaşmayan Tahir Süleymanov ona lazımi cavabları verib və bu işlə bağlı sənədlərlə, müqavilələrlə danışıb. Bundan sonra isə icraçı direktorla son vitse-prezident arasında mübahisə düşüb, tərəflər söz “atışmasına” çıxıb. (apasport.az)
