"Təəssüf ki, oyun əlverişsiz hava şəraiti səbəbindən yarımçıq dayandırıldı. Biz oynamaq istəsək də hakimlər briqadası və rəqib komandanın baş məşqçisi qarşılaşmanın belə şəraitdə davam etməsini istəmədi".
Korner.az-ın məlumatına görə, bu sözləri "Neftçi"nin məşqçisi Tərlan Əhmədov klubun rəsmi saytına açıqlamasında deyib. Gənc mütəxəssis dünən Zaqreb "Dinamo" ilə baş tutan yoxlama oyunu ilə bağlı fikirlərini bildirib:
"Ümumilikdə komandanın oyunundan razı qaldım. Ötən matçlarla müqayisədə bu gün daha yaxşı təsir bağışladıq. Xəttlərarası əlaqə eləcə də futbolçuların fiziki durumu istənilən səviyyədədir. Bakıda da bir neçə gün vaxtımız olacaq ki, bəzi kiçik səhvlərimizi aradan qaldıraq. "Zestafoni" ilə oyuna qədər komanda tam hazır olacaq".