“Simurq” 2013/14-cü il mövsümünə hazırlıqları davam etdirməkdədi.
Korner.az-ın klubun rəsmi saytına istinadən yaydığı xəbərə görə, təlim-məşq toplanışının ikinci mərhələsi üçün iyunun 23-dən Kartepedə olan komanda dünən iki məşqə çıxıb.
Srağagün “Dila” ilə yoldaşlıq görüşü keçirdiyindən Georgi Çixradze yetirmələrini çox yormayıb. Səhər hazırlığı qısa məsafəli qaçış və isinmə hərəkətləri ilə başlayıb. Daha sonra Qori təmsilçisi ilə görüşdə 90 dəqiqə meydançada olan futbolçular məşqi “kvadrat” oynamaqla tamamlayıb. Digərləri isə qısa ötürmələr üzərində işlədikdən sonra, ikitərəfli oyun və qapıya zərbələrlə səhər çalışmasını tamamlayıb.
Axşam məşqində isə Georgi Çixradze yoldaşlıq görüşündə forma geyinmiş futbolçulara istirahət verib. Əvəzləmədən görüşə çıxan və forma geyinməyənlər isə hazırlıqda iştirak edib. Axşam çalışmasıda qaçış və isinmə hərəkətləri ilə başlayıb. Daha sonra “kvadrat” və kiçik qapılarda ikitərəfli oyunla məşqi tamamlayıblar.
Komandanın məşqlərini klub prezidenti Anar Bəkirov da yaxından izləyib. Srağagündən Kartepeyə gələn Bəkirov “Dila” ilə keçirilən yoldaşlıq görüşünə də tamaşa edib.
“Simurq” təlim-məşq toplanışı ilə yanaşı, transfer çalışmalarını da davam etdirir. Növbəti mövsümə iddialı heyət qurmağı planlaşdıran Zaqatala təmsilçisinin hazırda düşərgəsində baxışda olan dörd futbolçu var. Qarşıdakı günlərdə daha bir neçə futbolçuda Kartepeyə təşrif buyuracaq.
İyulun 8-də ölkəyə qayıtmağı planlaşıdıran komanda Türkiyədəki təlim-məşq toplanışı çərçivəsindəki son yoxlama görüşünü ayın 7-də keçirəcək. “Sarı-qaralar”ın rəqibi Liviyanın “Əl-Nəsr” klubu olacaq. 1954-cü ildə yaradılan Benqazi şəhərinin təmsilçisi ölkənin ən köklü komandalarından biridi.
