Kartəpədə yerləşən “Green Park” otelində məskunlaşan “Simurq” hazırlıqlarını plana uyğun davam etdirməkdədir.
Korner.az– klubun saytına istinadən məlumatına görə, iyunun 30-da ilk yoldaşlıq görüşünü keçirdən Zaqatala təmsilçisi dünən bir məşqə çıxıb.
Səhər hazırlığı əvvəlcə fitness zalda başlayıb. Bir saat fiziki hazırlıq üzrə məşqçi Aleksandr Karakliçin rəhbərliyi altında məşq edən komanda, daha sonra otelin meydançasına yollanıb. Uzun məsafəli qaçışdan və isinmə hərəkətlərindən sonra iki qrupa bölünüb. “Spartak-Nalçik”lə oynanılan matçda 90 dəqiqə oynamış futbolçular “kvadrat”la məşqi tamamlayıb. Digərləri isə baş məşqçi Georgi Çixradzenin rəhbərliyi altında taktiki və texniki tapşırıqlar üzərində çalışıb. Sonda isə qapıya zərbələr yerinə yetirilib. Bununla dünənki hazırlıq tamamlanıb və məşqçilər korpusu yetirmələrinə istirahət verib.
Qeyd edək ki, “Simurq”un düşərgəsində üç futbolçu baxışda idi. Artıq onlardan biri haqqında qərar verilib. Müdafiəçi Migel Daçelet “sarı-qaralar”ın düşərgəsindən ayrılıb. Belçikanın U-21 yığmasında da forma geyinən futbolçunun son klubu “Lers” olub.
