Deyəsən, arzularımız bu dəfə daha erkən puça çıxacaq. İlk etapda üçdə-üç edən klublarımızın avrokuboklarının 2-ci mərhələsindəki nəticələri yekunda sıfır olma ehtimalını göz önünə gətirir. “Neftçi”nin ilk oyundakı heç-heçəsi fonunda “Qarabağ”ın əzmkar qələbəsindən sonra qalan ümidlərə şükür. Amma cavab matçlarının səfərdə olacağını nəzərə alsaq, həyəcanlı olmağa dəyər. “İnter” və “Xəzər-Lənkəran”dan danışmağa isə dəyməz…
Yox, “Xəzər-Lənkəran”dan danışmağa çox söz var. Hayfada baş verənlər bu klubun ağ günə çıxma ehtimalının elə yuxarıda dediyimiz sıfıra bərabər olduğunu göstərdi. Sizə adi gəlməsin, sıfır heç də kiçik rəqəm deyil. Əksinə, ən böyüyüdür. Sıfıra nəyə vursan, elə qayıdıb sıfır olacaq. Bax, son 10 ildə “Xəzər-Lənkəran”ın timsalında bunu müşahidə edirik. Budur, artıq sıfırın qarşısına bir rəqəmi düşüb. Axı, klubun yubileyidir. Bu münasibətlə futbolumuzda böyük iz qoyanları təbrik edirəm. Əlbəttə, sıfırın qarşısında iki və ya üç rəqəmi də ola bilər. Lakin buna ümid çox azdır. Bilirsiniz niyə? Çünki xərclənən sıfırların qarşısında rəqəmlər günü-gündən böyüyür. Klub isə yerində iməkləyir. 10 yaşlı ağacın heç cur bar verməməsi bağban üçün utancvericidir. Ağacın kötüyünə nə qədər su əlavə etsən, mineral kübrə versən də, boy atmır ki, atmır.
Elə sıfırların yanına yekə bir rəqəm qoyub, Toşakı da ölkəmizə dəvət ediblər. Məqsəd əcnəbi mineral sayəsində cılız ağacın boy atmasına təkan verməkdir. Unutmayın ki, bu addım heç də uğurlu deyil. Çünki ağacınız müəyyən bar verdikdən sonra yenə də solacaq, xəzan olub küləklə sovrulacaq. Toşak bu komandanın mineralı ola bilməz. Necə ki, Rasim Kara, Mirça Rednik ola bilməyib. “Makkabi” ilə matçdan sonra uelsli məşqçi də heç bir günah görmürəm. O, əlinin altındakı materialla bundan artığını bacara bilməz. Heyətdəki nə Nildo – Kanalesdi, nə Benuahi – Riçarddı, nə də Ramaldanov – Mitreskir. Bu sadəcə cəmi üç müqayisədi…
Özünüzü aldatmayın. Gedin, sıfırların qarşısındakı rəqəmləri sayın.
Hesabınız da 0:2 olub. Axı, sıfırları sevirsiniz!
