Topaz Premyer Liqasında cari mövsümün qış fasiləsindən sonra ən uğurlu komandalarından biri də “Keşlə” oldu. Paytaxt klubu ölkə kubokunun finalına da vəsiqə qazanıb. Komandaya qış transfer pəncərəsində qoşulan Sezar Meza Kolli “Keşlə”nin əsas fiqurudur.
Paraqvaylı yarımmüdafiəçinin müqavilə müddəti mövsümün sonunda başa çatacaq. Komandanın liderlərindən olan futbolçunu klub rəhbərliyi heyətdə saxlamaq niyyətində olsa da, yarımmüdafiəçi aldığı ciddi təkliflərdən sonra komandadan ayrılmaq qərarı verib.
Qeyd edək ki, 26 yaşlı futbolçu cari mövsümdə 13 oyuna 2 qol vurub. O, ölkəmizdə “Keşlə” ilə yanaşı, “Zirə”nin də formasını geyinib.
