Çempionlar Liqasının III təsnifat mərhələsində “Qarabağ”ı mübarizədən kənarlaşdıran “Seltik” klubunun futbolçuları yenidən meydandakı davranışları ilə diqqət mərkəzinə düşüb.
Korner.az-ın Britaniya mətbuatına istinadən verdiyi məlumata görə, “Malmö” klubunun qapıçısı Yohan Viland pley-off mərhələsində qarşılaşdıqları Şotlandiya təmsilçisinin futbolçularının davranışlarından gileylənib.
O, Şotlandiyada keçirilən ilk görüşdə “Seltik”li futbolçuların meydanda özlərini donuz kimi apardıqlarını bildirib: “Seltik”li futbolçuların hamısı donuzdur, bu, onların yoludur. Siz meydanda sakit və təmkinli olmalısınız, necə ki, biz də bunu etməliyik. Qapımıza iki qol vuran Li Qriffitsin oyun ərzində nə dediklərini bilmirəm, ancaq o, özünü uşaq kimi aparırdı. Oyunboyu formamdan çəkməyə çalışırdı”.
“Malmö”nün müdafiəçisi Rasmus Benqtson da “Seltik”li futbolçuların oyunboyu çox danışdıqlarını deyib: “Seltik”in heyətində bir neçə futbolçu var idi ki, oyunboyu çox danışırdı. Yəqin, kimi nəzərdə tutduğumu bilirsiniz. “Seltik”in kapitanı (Skot Braun) və eləcə də, digərləri çox danışırdılar. Bu komandanın daha bir üzvü Nadir Çiftçi də özünü yaxşı aparmırdı. Onun ilk etmək istədiyi şey danışmaq idi. Çiftçi öz oyunundan daha çox danışmağa köklənmişdi. Ancaq mən bunun onlar üçün üstünlük olduğunu düşünmürəm”.
Qeyd edək ki, “Seltik” – “Malmö” oyunu 3:2 hesabı ilə meydan sahiblərinin xeyrinə başa çatıb. Bu komandalar arasında cavab matçı avqustun 25-də İsveçdə keçiriləcək.
Xatırladaq ki, “Qarabağ”ın futbolçusu Qara Qarayev də “Seltik”lə cavab oyunundan (0:0) sonra rəqib futbolçuların meydandakı davranışlarını pisləyərək, onlar haqda tənqidi fikirlər səsləndirib: “Seltik”in oyunçuları meydanda futboldan başqa hər işlə məşğul idilər. Bizi təhrik edirdilər. Əsas da kapitanları. “Seltik”ə oyundan əvvəl rəqibə simpatiyam var idi, lakin bundan sonra uduzduğumuza görə yox, onların futbolçularının etdiyi hərəkətlərə görə heç vaxt bu komandaya azarkeşlik etmərəm. Çünki meydanda artıq hərəkət edirdilər, söyüş söyürdülər”. (Qol.Az)
