“Rəvan”ın baş məşqçisi Şahin Diniyev “Qaradağ Lökbatan”la kubok oyunundan sonra saytımıza fikirlərini bildirib.
Onun Korner.az-a verdiyi müsahibəni sizə təqdim edirik:
-Şahin müəllim böyükhesablı qələbə qazandınız. Oyun barəsində nə deyə bilərsiniz?
-Böyükhesablı qələbə qazansaq da, oyun çətin keçdi. Deməzdim ki, asan qələbə qazandıq. “Qaradağ Lökbatan I Divizionda lider komandalardan biridi. Oturuşmuş, stabil heyəti var. Qalib gəldiyimiz üçün şadam.
-Şahin Diniyev gəlişindən sonra “Rəvan”da hansı dəyişiklikləri edə bilib?
-Bu barədə nəsə demək istəməzdim. Bunu kənardan baxanlar daha yaxşı qiymətləndirə bilər. Biz sadəcə komanda şəklində mübarizə aparmağa, kompakt futbol oynamağa çalışırıq. Zəif cəhətlərimiz var, lakin bunları aradan qaldırmaq üçün çalışırıq. Sona qədər döyüşən, asan təslim olmayan bir “Rəvan” var artıq. Daha da yaxşı olacağıq.
-Komandada taktiki-texniki baxımdan hansı dəyişikliklər gözlənilir?
-Taktiki cəhətdən mütləq dəyişikliklər olacaq. Lakin bunun üçün heyətdə də dəyişikliklər olmalıdı. Artıq daha çox hücum edən, qolu arzulayan bir komandaya çevrilmək istəyirik.
-Transferlərin olacağı barədə məlumat vermisiniz. Bəs hansı mövqeləri gücləndirmək istəyirsiniz?
-Hər mövqeyə, yəni hər 3 xəttə transfer düşünürük. Komandanı gücləndirmək üçün yeni futbolçular transfer edəcəyik.
-Bəs komandadan gedənlər olacaqmı?
-Əlbəttə, lakin az oyunçu gedəcək. Bu barədə qəti qərarımı verməmişəm. Hələ ki, çempionatdakı növbəti oyunları düşünürük. Bu barədə fasilə zamanı düşünüb, hərəkət etməyə vaxtımız olacaq.
-Şahin Diniyevin “Rəvan”da şəxsi hədəfi nədi?
-Bu gün üçün ən böyük hədəfim komandamın oyununu daha da gücləndirmək və rəqiblərlə başa-baş mübarizə aparmaqdı.
