“Sabah”ın futbolçuları üçün əlamətdar oyun
25.12.2020 , 16:09
“Sabah” Azərbaycan Premyer Liqasının XIII turunda səfərdə “Sumqayıt”ı 2:1 hesabıyla məğlub edib. Bu qarşılaşma komandanın futbolçuları Slavik Alxasov və Aleksey İsayev üçün əlamətdar olub. Hər iki futbolçu “Sabah”ın formasında ilk qollarına imza atdılar.
Korner.az xəbər verir ki, həm Slavik, həm də Aleksey “Sabah”da vurduqları ilk qolun təəssüratlarını klubun saytı ilə bölüşüb:
Slavik Alxasov: “Sevinirəm ki, dünənki qələbəmizdə mənim də payım oldu. Bizim üçün çox vacib qələbə idi. İli qalibiyyətlə başa vurmaq istəyirdik ki, buna da nail olduq. Sumqayıtda qazanılan 3 xal bütün komanda üçün yaxşı motivasiya oldu. Bu cür vacib qələbəyə qolla töhfə verməyim, həmçinin “Sabah”da qol hesabımı açmağım mənim üçün ikiqat sevindiricidi”.
Aleksey İsayev: “Çoxdandı qol vurmurdum. Əlbəttə, qol vurmaq həmişə xoşdu. Ancaq mənim üçün bundan da əsas olan, komandamın qalib gəlməsidi. Şadam ki, “Sabah”da qol hesabımı açdım və komandamın qələbəsinə töhfə verdim”.
Slavik “Sumqayıt”la görüşün 26-cı dəqiqəsində hesabı açıb, Aleksey isə qarşılaşmanın 65-ci dəqiqəsində penaltidən fərqlənərək, oyunda həlledici, qələbə qolumuza imza atıb. Hər iki futbolçu “Sabah”a bu ilin yayında qoşulublar.
