Ötən mövsüm “Kəpəz”də sərgilədiyi oyunla diqqətləri üzərinə çəkən gənc qapıçı Ramil Kərimov son zamanlar yaşıl meydanlarda az-az görünür. Bu və digər suallara cavab olmaq üçün əlcək sahibinin özü ilə danışdıq. O əvvəlcə hazırki durumundan danışdı.
Korner.az həmin müsahibəni sizə təqdim edir:
-İşlərim qaydasındadır. Hazırda məxsus olduğum “Neftçala”nın heyətindəyəm. Hər şey normaldır. Məşqlərimiz normal qaydada davam edir. Oyunlara hazırlaşırıq. Bir sözlə hər şey superdir.
-Çoxdandır oynamırsan. Səbəb nədir?
-Çoxdandır meydanda olmamağımın səbəbini mən bilmirəm. Bunu məşqçilərimizdən soruşsanız daha dəqiqə cavab alarsınız. Mən məşqlərdə əlimdən gələni edir, canla-başla hazırlaşıram. Seçimi baş məşqçi edir. O kimi istəyir, kimi hazır sayırsa qapını da ona tapşırır. Açığı səhhətimdə yaranan problemdən sonra bir müddət futboldan, məşqlərdən uzaq qaldım. Amma indi tam formadayam. Məşqçimdən şans gözləyirəm. İmkan düşən kimi meydana çıxıb özümü göstərmək istəyirəm.
-Komandan haqda nə deyərdin?
-Mən mövsümün ilk yarısını icarə əsasında “Kəpəz”də çıxış etdim. Komanda haqda nə deyə bilərəm? Hər şey əladır. İstər şərait istər kollektiv. Bir ailə kimiyik. Özümü burada çox yaxşı hiss edirəm.
-“Neftçala”dakı şərait haqda danışdın. Biraz geniş məlumat ver…
-Buradakı şərait hamıya bəllidir. Klub rəhbərliyi peşəkar insanlardır. Saö olsunlar bizim üçün hər şərait yaradıblar. Futbolçu kimi bizim üzərimizə də ancaq qələbə qazanmaq uğur əldə etmək düşür. Əmək haqlarımızı vaxtı-vaxtında alırıq, qalmağa yerimiz , qidalanma hər şey yüksək səiyyədədir.
-Qarşınıza hansı məqsəd qoyulub?
-Hazırda vəziyyət elə gətirib ki çempionluqdan uzaq düşmüşük. Lakin 2-ci yer uğrunda mübarizəmizi davam etdiririk. Məncə doğru yoldayıq. Belə davam etsək məqsədimizə çatacağıq. Klub rəhbərliyi də qarşımıza 2-ci pilləni tutmağı məqsəd qoyub.
-Növbəti mövsümdə də “Neftçala”nın uğurları üçün çalışacaqsan?
-Gələcəklə bağlı heç bir söz deyə bilmərəm. Müqaviləm mövsümün sonunda başa çatır. Ondan sonar rəhbərliklə danışacam. Lazım bilsələr yenə canla –başla bu klubda çıxış edərəm.
