“Xəzər Lənkəran” klubunun futbolçusu Uğur Pamuk müsahibələrinin birində: “Neftçi”dən təklif gələrsə, heç vaxt getmərəm. Klubsuz qalaram, amma “Neftçi”də oynamaram. Çünki millinin düşərgəsində olanda bu komanda haqda o qədər pis şeylər eşitmişəm ki… Futbolçulara qarşı pis münasibət bəsləyirlər”-deyib.
Maraqlıdır millinin və “Xəzər Lənkəran”ın üzvü niyə bu qənaətə gəlib? Biz də məsələ ilə bağlı qarşı tərəfin – “Neftçi” klubunun da fikirlərini öyrənməyə qərar verdik.
“Neftçi”nin mətbuat xidmətinin rəhbəri Gündüz Abbaszadə futbolçu Uğur Pamuku yaxşı tanıdığını, onun bir zamanlar "Neftçi"də çıxış etmək üçün yalvardığını dilə gətirib:
“Uğur Pamuk? Bu futbolçunu yaxşı tanıyıram. Hələ o zaman mən ANS TV-də çalışırdım. Türkiyədə Titanik oteldə tanış olmuşduq. Dedi mən azərbaycanlıyam. Diqqətimi cəlb etdi. O zaman Almaniyanın 3-cü liqa klubunda çıxış edirdi. Bizimlə orada olan həmkarlarımdan birinə "Neftçi"də çıxış etmək üçün yalvarmışdı. Sonradan eşitdim ki, Bakıya gəlib, "Neftçi"də heyətə düşmək üçün baxışda olub. Amma, bəyənilməyib. Yəqin unudub o günləri. Uğur Pamukun yaddaşını təzələyə bilərəm”.
Daha sonra klub rəsmisi Uğur Pamuku səmimiliyə dəvət etdi:
“Uğur əlini qoysun ürəyinin üstünə səmimi cavab versin. “Neftçi”nin heyətində öz mövqeyində çıxış edən futbolçulardan hansı birindən güclüdür? Amma, tam səmimi cavab versin”.
publika.az
