Azərbaycan millisinin baş məşqçisi vəzifəsinə namizəd olan Robert Prosineçki bu gün Premyer Liqanın 13-cü turunun “Xəzər-Lənkəran” – “Neftçi” görüşünü izləyib.
Korner.az-ın məlumatına əsasən, jurnalistlər üçün keçirilən brifinqdə Azərbaycan millisində işləmək perspektivindən danışan xorvat mütəxəssis bir neçə gün Bakıda olacağını deyib.
“AFFA tərəfindən irəli sürülən şərtlər maraqlıdır. Onlarla tanışam. Bu gün çox maraqlı oyun izlədim. Hər iki komanda yaxşı təsir bağışladı. Əlbəttə, hər bir matçda dörd qırmızı vərəqə olmur. Nadir hallarda bir oyunda dörd futbolçu meydandan qovulur. Sabah aşağı yaş qruplarından ibarət komandaların oyunlarını izləyəcəm. Mən səbəbsiz yerə müqaviləni pozmuram. “Kayserispor”la aramızda problem var idi. Azərbaycanda isə belə olmayacaq. “Qarabağ”ın “Sent Etyen”lə oyununu izləmək üçün Fransaya gedəcəyəm.
Azərbaycan millisiylə bağlı konkret nəsə söyləyə bilmərəm. Həftəsonuna qədər çox şeyə aydınlıq gəlməlidi. Ona görə gəlin tələsməyək. Şərtlərlə tanışam. Razılaşsaq, ailəmlə birgə Bakıda yaşayacam. 1-2 gün də gözləyin, bundan sonra bilinəcək ki, yığmanın baş məşqçisi olacam, yoxsa yox. AFFA prezidenti Rövnəq Abdullayevlə bəzi məsələlər haqda danışmışıq”.
O, daha sonra deyib: “Avro-2016”nın Xorvatiya – Azərbaycan görüşünü izləmişəm. Həmin oyunda Xorvatiya 6:0 hesablı qələbə qazanıb. Bununla belə, Azərbaycan millisinin potensialı var. Hesab o demək deyil ki, komandanız inkişaf edə bilməz. Potensial var, sadəcə işləmək lazımdır. Unutmayaq ki, Xorvatiya çox güclü komandadır. Ona görə hesab böyük olub. Yığmanız İtaliya və Bolqarıstana qarşı da yaxşı çıxış edə bilməmişdi. Komandada potensial var, inanıram ki, bundan sonra yaxşı olacaq”.
