Millimizin üzvü Ramil Şeydayevin şərəfini qoruduğu “Trabzonspor” Türkiyə kubokunun H qrupunda 2-ci liqa təmsilçisi “Gümüşhanespor”u məğlub edə bilməməsi (0:0) azarkeşləri özündən çıxarıb.
Korner.az-ın məlumatına görə, Qara dəniz klubunun fanatları komandaya səviyyəli hücumçu tələb ediblər. Matçın gedişində cənubi koreyalı forvard Hyun Yun Sukun əvəzinə müdafiəçi mövqeyində çıxış edən Karl Medjaninin oyuna daxil olması isə azarkeşlər tərəfindən birmənalı qəbul edilməyib. “Bordo-mavili” tərəfdarlar Sukun əvəzinə Şeydayevin daxil olmasını tələb etsələr də, baş məşqçi Ərsun Yanal fərqli qərar verib.
Həmin oyunda şans qazanmayan Ramil Şeydayev ayrılıq qərarını verib. Komandaya yaxın günlərdə kolumbiyalı hücumçu Uqo Rodalleqa da qoşulacaq və Ramilin oynamaq şansı daha da azalacaq. Bu səbəbdən millimizin üzvü qış transfer pəncərəsi bağlanana kimi, yeni komandaya keçmək istəyir.
