“Rəvan” yeni mövsümə hazırlığını davam etdirir. Komanda bazar ertəsi baş tutan bərpaedici hazırlıqdan sonra yenidən “gücləndirilmiş rejimə” keçib.
Korner.az-ın klubun saytına istinadən verdiyi məlumata görə, gündə 2 dəfə məşq edən futbolçular hazırlığın birinci mərhələsində olduqca istəkli görünür. “Bayıl Arena”da baş tutan bugünkü səhər məşqi də bu baxımdan istisna olmadı.
Baş məşqçi Ramil Əliyev axşam məşqinin trenajor-zalda olacağını nəzərə alıb, hazırlığı taktiki-texniki çalışmalar üzərində qurdu. Belədə futbolçular da toplu çalışmalarla “yükləndi”. Dar sahədə pressinq tətbiq etmək, bu pressinqdən çıxmaq üzərində işləyən oyunçular ənənəvi “kvadrat” üzrə də çalışdılar. Təxminən saat yarım çəkən məşqin sonunda komanda üzvləri cinah asmaları və onların qapanması, eləcə də qapıya zərbələr üzərində işlədi.
Məşqin daha bir özəlliyi onda oldu ki, legionerlər tam heyətlə ilk dəfə meydana çıxdı. Belə ki, polşalı qapıçı Lukaş Sapela artıq Bakıdadır. Səhər saatlarında paytaxtımıza dönən qolkiper peşəkarlıq nümayiş etdirərək özünü səhər məşqinə çatdırdı. Komanda üzvlərinin Lukaşın bu addımını alqışla qarşılaması da diqqət çəkdi.
