"Rəvan" komandasının “sükanı arxasına” yeni baş məşqçi gətirilib.
Korner.az-a bu haqda klubun mətbuat katibi Anar Mustafayev bildirib. Premyer Liqanın IV turunda türkiyəli mütəxəssis Cevat Güləri istefaya göndərildikdən sonra komandaya Bəhman Həsənov başcılıq edirdi.
“Komanda rəhbərliyi düşünürdü, danışıqlar gedirdi bu haqda, hazırlaşırdıq yeni baş məşqçi gətirməyə. “Rəvan”ın vəziyyəti qat-qat yaxşı ola bilərdi turnir cəvəlində. Öz meydanında “Simurq”dan aldığı məğlubiyyət zərbə oldu komandaya. Hazırlanan strategiya, plan effektiv olmadı. İndi isə komanda yeni baş məşqçinin nəzarəti altında yeni plan üzrə məşqlər keçir. Əlbəttə ki, Bəhman müəllim də davam etdirəcək komandada öz fəaliyyətini. İşlər köhnə qaydada gedəcək, sadəcə yeni baş məşqçinin nəzarəti altında. Köhnə də deyə bilərdim, çünki Kemal Alispahiç bizim klubda vaxtilə çalışıb.”
Qeyd edək ki, yeni gətirilən baş məşqçi Kemal Alispahiç "Rəvan"ın sələfi olan "Muğan"a məşqçi təyin olunsa da, 6 ay sonra vəzifəsindən kənarlaşdırılmışdı.
