Milli komandamızın və “Qarabağ” klubunun kapitanı Rəşad Sadıqovun Antalıyaya ezam olunmuş bir qrup jurnalistə müsahibəsi
– Əvvəlcə millimizin “Şaxtyor”la yoldaşlıq oyunu (1:2) haqda fikirlərini bilmək istərdik.
– Fikirlərim müsbətdir. Məşqçimizin yeni oyun sistemi ilə oynayırdıq. Dəyişikliklər çox idi. İki heyətlə oynadıq. İkinci hissədə meydanda başqa heyət var idi. Məşqlərdə çox çalışırdıq. Prosineçki bizə öz oyun fəlsəfəsini aşılamağa çalışır. Az da olsa, onun bizdən istədiyi oyunu göstərə bildik.
– Prosineçkinin matçdan bir gün əvvəl açıqladığı heyətdə adın yox idi. Sonra nə baş verdi ki, baş məşqçi Ruslan Abışovun əvəzinə sənə əsas heyətdə yer verdi?
– Məşqdə ayağımda ağrı hiss etdim. Həkimlər müayinə etdilər və ciddi problemin olmadığı aşkarlandı. Oyun günü məşqçilərlə söhbət etdim. Prosineçki bildirdi ki, hazırsansa, oyna.
– Oynamağın zədənə mənfi təsir etmədi ki?
– Xeyr. Oyunum zəif alınıbsa, bunun zədə ilə bağlılığı yoxdur.
– Prosineçkinin oyun fəlsəfəsi necədir?
– Daha çox sürətli və kombinasiyalı hücumlara üstünlük verir. Top rəqibdə olanda kompakt müdafiə olub, aqressiv olmağımızı istəyir. Təbii ki, 3-4 məşqlə hər şey alına bilməz. Ancaq “Şaxtyor”la oyunda məşqçinin tapşırıqlarını gözlədiyimdən artıq yerinə yetirdik. Topa nəzarət edə bilirdik. Kompakt müdafiə olunmağı da bacardıq. Komandanın tez bir zamanda bunu bacarmağı xoşuma gəldi.
– 4-1-4-1 taktiki sxeminə keçdikdən sonra mərkəz müdafiəçilərinin işinin daha çətin olacağını düşünmək olarmı? “Şaxtyor”la oyunda da gördük ki, Qara Qarayev müdafiəyə kömək etdiyi halda, Rahid Əmirquluyev daha çox hücuma atılırdı.
– Onsuz da orta xətdə üç futbolçu oynayır. Meydana iki hücumçu ilə çıxsaq, onda böyük dəyişiklik olardı. Ancaq indiki halda dayaq yarımmüdafiəsində bir və ya iki futbolçu oynamağının fərqi yoxdur. Düzdür, bu sistemlə daha hücumameyili oynamalı oluruq. Baş məşqçimizin istəyi də budur. Ona görə də hücumameyilli heyət qurur. Məncə, kollektiv şəkildə müdafiə olunsaq, problem yaranmayacaq. Bu, böyük komandalarla oynayayarkən vacib şərtdir.
– Millimiz Prosineçkinin oyun fəlsəfəsinə əməl etmək üçün nə dərəcədə hazırdır? Və tam mənimsəməsi üçün nə qədər vaxta ehtiyacı var?
– Əsas problemimiz vaxtla bağlıdır. Vaxtımız çox azdır. Çünki oyun sistemimizdə və tərzimizdə yüz faiz dəyişiklik var. Heyət baxımından da bu fərqi görürsüz. Sırf hücumameyilli futbolçular milliyə dəvət olunub.
Təəssüflər olsun ki, bu yeniliklərin özünü doğrultması üçün vaxtımız azdır. Üzərimizə böyük məsuliyyət düşür. Məşqçilər bizi ancaq psixoliji və taktiki cəhətdən qarşıdakı oyunlara hazırlamalıdırlar. Başqa şeylərə vaxt itimək olmaz.
– Avro-2016-nın seçmə mərhələsində millimizin növbəti rəqibi Malta olacaq. Antalya toplanışında Malta ilə oyunun müzakirəsi gedibmi?
– Əlbəttə, bu barədə çox müzakirələrimiz olub. Rəqibi analiz etmişik. Bu təlim-məşq toplanışında taktiki cəhətdən çox işlədik. Psixoloji cəhətdən də yaxşı hazırlaşdıq. Baş məşqçimiz bizimlə həm fərdi, həm də kollektiv şəkildə söhbətlər etdi. Uşaqlar da sağlolsunlar ki, bu söhbətlərdən yaxşı nəticə çıxardılar. Prosineçki komanda üzvlərinə başa salıb ki, siz yaxşı futbolçusunuz. Məşqçimiz bunu dedikdə hiss olunur ki, səmimi danışır.
Ümumiyyətlə, Prosineçki səmimi insandır. Onun istər tənqidini, istərsə də tərifini qəbul edirik. Komandamızda gözəl ab-hava yaranıb. İstərdim ki, bunun davamı gəlsin. Buna çox ehtiyacımız var idi. Ustalıq səviyyəsində kimdənsə geri qala bilərik. Ancaq bunu kollektiv oyunumuzla, daha istəkli olmağımızla ört-basdır edə bilərik.
– Bunu ona görə soruşuram ki, Malta ilə oyunöncəsi niyə məhz “Şaxtyor”un sparrinq seçildiyini bilmək istəyirəm. Bu komandaların arasında nə cür oxşarlıq var?
– “Şaxtyor” kimi güclü rəqibin seçilməsi çox yaxşı oldu. Baş məşqçimiz oyundan əvvəl bizə bildirdi ki, siz böyük komandaya qarşı oynaya bilərsiniz. Fasilədə də dedi ki, gördünüzmü, mən sizə bacaracağınızı demişdim. Qeyd etdi ki, daha yaxşı hazırlıqlı olsanız, hər şey etmək olar. Yəni güclü rəqiblə qarşılaşmağımız psixoloji cəhətdən önəmli idi. Rəqib kimi “Şaxtyor” bunun üçün seçilmişdi. Ancaq Malta ilə oyunumuz fərqli olacaq. Yəqin ki, biz topa daha çox sahib olacağıq. Rəqib daha çox müdafiəyə üstünlük verib, əks hücumlara bel bağlayacaq. Biz isə hücumda oynayacağıq. Yəni “Şaxtyor” və Malta ilə oyun bir-birindən fərqli olacaq. “Şaxtyor”la qarşılaşma bizim üçün psixoloji hazırlıq idi. Çünki rəqibimiz bir neçə gün əvvəl “Bavariya” kimi komanda ilə heç-heçə etmişdi. Futbolçularımız bu sınaqdan yaxşı çıxdılar. Aqressiv oynadıq. Bu görüş bizə çox şey qazandırdı. Məşqçilər də gördülər ki, futbolçularda özünəinam var.
– Komandaya dəvət alan yeni futbolçular haqda fikrin necədir?
– Yeni futbolçuların hər biri məni yaxşı tərəfdən təəccübələndirdi. Məndə inam yarandı ki, yaxın 4-5 ildə çox yaxşı komandamız olacaq. Bir neçə mövqeyə də futblçular yetişsə, əla bir komandamız olacaq.
– Prosineçki müsahibəsində israrla deyirdi ki, Anton Krivotçuk əsas yığmanın sol cinah müdafiəçisi problemini aradan qaldıracaq yaxın illərdə. Sən onda bu potensialı görürsən?
– Baş məşqçimizin dəvət etdiyi hər bir futbolçuda nəsə var. Yığmaya heç kim boş yerə dəvət almayıb. Krivotçuk da perspektivli oyunçudur. Doğrudan da, bu gün müdafiənin sol cinahında problemimiz var. Yaxın gələcəkdə bunu kiminləsə həll etmək lazımdır. Krivotçuk gələcəyə ümid verir. Yaxşı sürəti var. Topla da yaxşı oynayır. Məşqçilərin niyyəti odur ki, 2-3 ildən sonra onun sayəsində sol cinahdakı boşluğu dolduraq.
– Milli komandalarımızın əsas problemlərindən biri də hücumçudur. Hətta əsas yığmanın “alt yapısı” olan U-21-in çalışdırıcısı Yaşarm Vahabzadə komandasında oynatmağa normal forvard tapa bilmədiyini deyir.
– Ümumiyyətlə, futbolda ən çətin mövqe hücumçudur. İstənilən ölkədə bu mövqedə çətinlik var. Türkiyə kimi millidə cəmi iki hücumçu var. Bizim bir neçə hücumçumuz var. Ancaq heyətimiz geniş olsa, daha yaxşı olardı. Ümid edirəm ki, Rauf Əliyev, Vüqar Nadirov, Vaqif Cavadov kimi futbolçularımız hücumdakı problemi hiss etdirməyəcəklər. Əvvəllər daha çox müdafiədə oynayırdıq. Ona görə də hücumçularımız dəstəksiz qalırdı. İndi daha çox hücumameyilli oyanayacağıq. Yəqin ki, bunun sayəsində hücumdakı problemləri həll edəcəyik. Bunu komanda çəklində bacara bilərik. Müdafiə və hücum 1-2 futbolçunun işi deyil. Xüsusilə də böyük oyunlarda komanda şəklində oynamalısan. Əgər hücumda nəsə edə bilməsək, bu, hücumçuların yox, komandanın problemidir.
