.jpg)
"Qarabağ"ın baş məşqçisi Qurban Qurbanov Korner.az saytına müsahibə verib.
– Antalya toplanışını necə dəyərləndirərdiz?
Anyalya toplanışımız yaxşı keçdi. Öz proqramımız üzərində çalışdıq. Sonlara doğru altı oyunçumuzun milli komandaya getməsi yaxşı olmadı. Çünki qarşıda bizi "Qəbələ" ilə oyun gözləyir. Onlar da bizimlə olsaydı, daha yaxşı olardı. Amma başqa yolumuz yoxdu. Çalışacağıq ki, hər bir oyunçumuzu oyuna hazırlayaq.
– Yeni transferlər haqqında nə deyə bilərsiz? Yəni, bu transferlər sizi qane edirmi?
Kristian Torres məşqlərimizdə zədə aldı. Ona görə də komandayla məşq edə bilmədi. Hazırda Torres fərdi məşq edir və o gələn həftə komandaya qoşulacaq. Onun haqqında hələ ki nəsə demək düzgün olmaz. Amma biz onu izləyirdik və bəyənmişdik. Elvin Musazadə də cavan oyunçularımızdan biridi. İlk oyununda qol vurdu. Hər bir oyunçumuza komandaya uyğunlaşmağa vaxt lazımdır. Digər transferlərimizdən Reynaldonu da bəyənmişdik və onunla birbaşa müqavilə bağladıq. Reynaldo ailəsini Bakıya gətirmək üçün vətəninə qayıdıb. O da qarşıdakı günlərdə bizimlə çıxış edəcək.
– Elvin Musazadə nə üçün məşqdə iştirak etmir?
Xəstədi. Həm də məşqdə zədə almışdı. Bu iki səbəbə görə məşqləri buraxır. Özüm icazə vermişəm.
– "Qarabağ"ın əsasən hücum xəttində problemlər var idi. Sizcə, Subaşiç bu problemləri aradan qaldıra biləcək?
Subaşiç hələ əvvəlki formasında deyil. O,məşqlərdə özünü yaxşı tərəfdən göstərməyə çalışır və heç də pis çalışmır. Onu hamı tanıyır. Mən özüm də "Neftçi"də olduğum vaxtdan tanıyıram. O, bizim komandaya lazımdır. Biz indi də hücumçu axtarırıq. Bəzi oyunçuları bəyənsək də, onların klubları ilə problem çıxdı.
– Müsahibələrinizin birində demişdiz ki, bir azərbaycanlı hücumçu transfer edəcəksiz. Bu oyunçunun kim olduğunu deyə bilərsiz?
Açığı, bu yadımdan çıxıb. Ola bilər ki, azərbaycanlı oyunçu olsun. Bəlkə də mən fikrimdə Subaşiçi nəzərdə tutub demişəm. İndi yerli oyunçu tapmaq çətindi.
– Komandınızı qarşıda "Qəbələ"ylə çətin oyun gözləyir. Sizcə, komandanız bu oyuna hazırdı?
Mən bu oyun haqqında əvvəlcədən proqnoz vermək istəmirəm. "Qəbələ" çox yaxşı komandadı və onun yaxşı hücum xətti var. Çox sürətli oyunçuları var. Əlbəttə ki, evdə oynuyurlar. Buna görə də üstünlük onların tərəfindədir. Çalışacağıq ki, qələbə qazanaq.
– Rəhbərlik qarşınıza çempion olmağı bir hədəf qoyub. Bu il "Qarabağ" çempion ola biləcəkmi?
Biz hər il çempionluq üçün oynamışıq. Çalışırıq ki, hər bir oyunda qələbə qazanaq. Bunun üçün də əlimizdən gələni edirik.
Adil Mirzəzadə
