“Ən azı heç-heçə olmasını istəyirdik. Səhvlərdən qol buraxdıq. Futbolçulara bir o qədər də iradım yoxdu. Kiyevdəki qələbəni çox şişirtməməli olduğumuzu demişdim. Bu, uşaqlara təsir edə bilərdi”.
Korner.az-ın məlumatına görə, bu sözləri “Qarabağ”ın baş məşqçisi Qurban Qurbanov Avropa Liqasının qrup mərhələsinin IV turu çərçivəsində “Dnepr”ə qarşı oyundan sonra deyib.
Qurbanov bildirib ki, əvvəlcədən qarşımıza minimum 2-ci yeri hədəf qoymamışdıq: “Bəlkə də “Sent-Etyen”lə oyun bundan asan olacaq. Çünki “Dnepr”ə qələbədən sonra Bakıda hardasa yenilgiyə hazır idim. Çünki azarkeşlər Bakıda da qələbə gözləyirdi. Bu da əlavə məsuliyyət formalaşdırırdı. Şanslarımız hələ qalıb. Qarşıdakı oyunlara baxacağıq. Öz oyunumuzu hər dəfə yaxşılaşdırmağa çalışırıq. Oyun sxemimizdə dəyişiklik olmur. Səfərdə də, evdə də eyni cür mübarizə aprırıq. Oyunu Reynaldonun üzərində qurmamışdıq. Bilirdik ki, onu “bağlayacaqlar”. İlk hissədə Riçarda qarşı təkbətək oynayırdılar. Amma bəzi dəyişikliklər etməklə, hardasa bunun qarşısını almağa çalışdıq. Amma həmkarım belə düşünürsə, onun fikirlərinə hörmətlə yanaşıram”.
Çslışdırıcı ukraynalı jurnalistin “Siz uzun müddət Rusiyada çıxış etmisiniz. Niyə mətbuat konfransını rus dilində aparmırsınız?” sualına belə cavab verib: “Bizim mentalitetimiz var. Əgər rus dilində danışmaq istəyirsinizsə, mən sizinlə mətbuat konfransından sonra təkbətək danışa bilərəm. Amma indi tərcüməçimiz var və UEFA qaydalarına uyğun olaraq öz dilimizdə danışıram”.
