Türkiyənin futbol üzrə üçüncü liqası çərçivəsində keçirilən “Van Böyükşəhər Bələdiyyəspor” – “Berqama Bələdiyyəspor” qarşılaşmasında əsgər salamı qalmaqala səbəb olub.
Korner.az-ın məlumatına görə, 2:2 hesabı ilə başa çatan matçın 84-cü dəqiqəsində qonaq komandanın bərabərlik qolunu vuran Gökhan Çetinus sevincini əsgər salamı verməklə izhar edib.
Onun bu hərəkəti Van klubunun məşqçi və futbolçu heyətini özündən çıxarıb. Tribunalara toplaşan yerli azarkeşlərin də “Biji Serok Apo” (“Yaşasın öndərimiz Apo”), “Bura Kürdüstandır, burdan çıxış yox” kimi şüarlar səsləndirərək etirazla qarşıladığı hərəkət Gökhana baha başa gəlib. Meydan sahibi komandanın futbolçu və məşqçiləri onun üzərinə hücum çəkiblər. Rəqibin təpik və yumruqlarından qorunmaq istəyən futbolçu qaçaraq çevik polis alayının arasına girdi. Asayiş keşikçilərinin müdaxiləsindən sonra hadisənin daha da böyüməsinə imkan verilməyib.
Qeyd edək ki, Van Türkiyədə kürdlərin kompakt yaşadıqları vilayətlərdəndir.
Bu sırada polis digər futbolçulara müdaxilə edərək hadisələrin böyüməsini önlədi.
