“Qarabağ”ın Çempionlar Liqasının II təsnifat mərhələsindəki rəqibi olan Malta təmsilçisi “Valletta” klubunun əsası 1943-cü ildə qoyulub.
Korner.az-ın məlumatına görə, klub ev oyunlarını 18 min tamaşaçı tutumuna malik “Ta’Qali” stadionunda keçirir.
“Valletta” 3 klubun – “Valletta Prestons”, “Valletta Sent-Pouls” və II dünya müharibəsindən əvvəl 2 dəfə ölkə çempionu olmuş “Valletta Yunayted” komandalarının birləşməsi nəticəsində formalaşıb. Komandanın ölkə çempionatında böyük uğuru nəzərə çarpır. Tarixi ərzində 22 dəfə ölkə çempionluğu yaşayan klubu hazırda Cilbet Aqius çalışdırır. İlk dəfə 1914/1915 mövsümündə çempion olan “Valletta” ötən mövsüm də qızıl medallara yiyələnib.
Ölkə kubokunu 13 dəfə qazanan “Qarabağ”ın rəqibi 10 dəfə superkuboka sahib çıxıb. Viktor Skirihanın prezidenti olduğu komanda Avropada ən yaxşı halda ikinci təsnifat mərhələsinə qədər irəliləyə bilib. “Valletta” həm Çempionlar Liqası, həm də Avroliqada II təsnifat mərhələsində mübarizəni dayandırıb. Ötən mövsüm Avroliqada mübarizə aparan klub Belarus “Minsk”inə məğlub olub. (1:1, 0:2).
