“Bizim üçün fantastik an oldu”
Bunu “Roma”nın futbolçusu Dieqo Perotti deyib.
Çempionlar Liqasının qrup mərhələsində son oyununu “Qarabağ”a qarşı keçirən İtaliya klubu 1:0 hesablı qələbə qazanaraq, 1/8 final mərhələsinə adlayıb.
Matçın 53-cü dəqiqəsində “canavarlar”a qələbə gətirən qola imza atan Perotti “Qarabağ” barədə müsbət fikirlər səsləndirib. Argentinalı hücumameyilli oyunçu 3 xalı çətinliklə əldə etdiklərini vurğulayıb: “Qrup mərhələsində keçirdiyimiz ilk görüşdə heç-heçə edəndə kimsə bizə inanmırdı. Ancaq başımızı aşağı salıb, əzmlə çalışdıq. Biz finişə zirvədə çatmağa layiq idik. Çətin olmasına baxmayaraq, bizim üçün ideal gecə oldu. Əlbəttə ki, heç də asan qələbə qazanmadıq. “Qarabağ” bizə çox problem yaratdı və olduqca təhlükəli hücumlar etdi. “Qarabağ”, həqiqətən də, boşluqları bağlamışdı. Onlar öz oyunlarını göstərirdilər. Biz isə məqam gözləyirdik. Belə oyunlar olduqca təhlükəli olur. Hamımız birlikdə çalışdıq və qələbə qazanmağa nail olduq. İndi də bu andan həzz almalıyıq”.
Qeyd edək ki, “Roma” C qrupunu 11 xalla zirvədə başa vurub. “Qarabağ” isə 2 xalla sonuncu olub.
apasport.az
