“Qəbələ”nin 19 yaşadək futbolçulardan ibarət komandası Azərbaycan çempionu adına yiyələnib.
Korner.az-ın klubun saytına istinadən yaydığı xəbərə görə, Hüseynqulu Quliyevin baş məşqçi olduğu komanda çempionat başa çatmamış 1-ci yeri təmin edən U-15, U-16 və əvəzedicilərin ardından kluba mövsümdə 4-cü çempionluğu qazandırıb.
U-14 komandasının Bakcell Elit Kubokunu da qazandığını nəzərə alsaq, U-19-un çempion olması ilə mövsümdə 5-ci titul əldə edilib.
“Qırmızı-qaralar” çempion tituluna XVII turdan təxirə salınan “Neftçi” ilə ev oyununda sahib çıxıb. 4:0 hesabı ilə qalib gələn komanda 19 oyundan sonra xal hesabını 52-yə çatdırıb. Bununla da “Qəbələ” “Zirə”ni arxada qoyaraq, liderliyi ələ alıb. Quliyevin komandası son tur öncəsi izləyicisindən 2 xal öndə olsa da, “Bakı” ilə baş tutmayan görüşə görə İntizam Komitəsi tərəfindən texniki qələbə alacağından, üstünlüyü 5 xala qədər artacaq. Bu isə son tur və təxirə salınan digər matçın nəticəsindən asılı olmayaraq I yerin taleyinə aydınlıq gətirib. Qızıl medalları təmin edən komanda mövsümün son matçlarına çempion kimi çıxacaq.
U-19 qızıl medallarla yanaşı, avrokuboklara vəsiqəni də təmin edib. Belə ki, ötən ildən etibarən bu yaş qrupu üzrə Azərbaycan çempionu UEFA Gənclər Liqasının “Çempionlar yolu”nda çıxış etmək hüququ qazanır.
Qeyd edək ki, ki, “Qəbələ” 2012/2013 mövsümündən keçirilən U-19 Liqasının daimi mükafatçısıdır. İlk yarışın qalibi olan “qırmızı-qaralar” 2013/2014 mövsümündə gümüş, 2014/2015 mövsümündə qızıl medal qazanıb. “Qəbələ” bu yarışda həm ikiqat çempion, həm də dördqat mükafatçı olan yeganə klubdur.
