“Qəbələ” İdman Klubunun təşkilatçılığı, Gənclər və İdman Naziriliyinin və Azərbaycan Kikboksinq Federasiyasının dəstəyi ilə Qəbələdə ilk dəfə olaraq kikboksinq üzrə reytinq xarakterli “Gabala Fight Series” turnirinin döyüşləri baş tutacaq.
Korner.az-ın klubun rəsmi saytına istinadən verdiyi məlumata görə, sabah saat 17:00-da başlayacaq şou gecəsi “İdman Azərbaycan” telekanalı ilə canlı yayımlanacaq.
Döyüşlər super ağır çəki dərəcəsində, dünyanın tanınmış idmançılarının, o cümlədən, təcrübəli azərbaycanlı kikboksçu Pərviz Abdullayevin iştirakı ilə keçiriləcək. Rinqə aşağıda qeyd olunmuş kikboksçular çıxacaq:
Daniel Korbeanu (Rumıniya) – Rahim Əliyev (Azərbaycan)
Roman Mayılov (Ukrayna) – Matyuş Kopyek (Polşa)
Quo Xianfenq (Çin) – Ramal Aslanov (Azərbaycan)
Yuri Kel (Almaniya) – Telman Süleymanov (Azərbaycan)
Teo Mikeliç (Xorvatiya) – Tadas Jonkus (Litva)
Ardından superağır çəkidə 4 döyüş baş tutacaq:
Erkan Varol (Türkiyə) – Albert Kraus (Hollandiya)
Camal ben Saddiq (Mərakeş) – Hesdi Greqes (Misir)
Lim Çi Bin (Cənubi Koreya) – Mosab Amrani (Mərakeş)
Jiao Fukai (Çin) – Pərviz Abdullayev (Azərbaycan)
Bu gün sözügedən tədbirlə bağlı «Qafqaz Sport» otelində mətbuat konfransı təşkil olundu. Toplantıda çıxış edən “Qəbələ” İdman Klubunun marketinq departamentinin rəhbəri Səməd Nəsibov, yarışın əhəmiyyətindən danışdı. Dedi ki, “Glory Ranked Fights” kikboksda ən yüksək reytinqli versiyadır. Bu tip yarış ilkdir. Gələcəkdə Qəbələdə yeni möhtəşəm yarışlar təşkil olunacaq.
Turnirin baş meneceri Dennis Kraull «Qəbələ Fight Series»in səviyyəli turnir olduğunu dedi. Bildirdi ki, “Glory Ranked Fights” dünyada tanınmış yarışdır:
«Qəbələ» klubunda əməkdaşlıq etdik. Qərara gəldik ki, onların da idmançılarını «Glory»-yə cəlb edək, kikboksçuların səviyyəsini artıraq. Müxtəlif ölkələrdən rinq ustalarını bu döyüşlərə dəvət etdik. Onların sıransında gənclər də yer alıblar».
Sabah şou-gecədə debüt edəcək Pərviz Abdullayev qələbə inamını gizləmədi: «Xeyli vaxtdır bu yarışa hazırlaşıram. Son bir ayın məşqlərini Niderlandda etmişəm. Rəqibin sürətli idmançıdır. Amma sabah güclü olduğumu sübut etməyə çalışacağam».
