Topaz Premyer Liqasının XVI turunun startı Qəbələdə verildi.
Saat 15:00-da başlanan oyun meydança sahiblərinin 2-1 hesablı qələbəsi ilə yekunlaşdı. Düzdür, matçda hesabı “Zirə”nin yeni transferi Aleksandr Dedov açdı. Amma sonradan özünə gələn “Qəbələ” 2 qol vura bildi.
3 qolun vurulduğu oyun final fitindən sonrakı hadisələri ilə daha çox müzakirə olundu. Belə ki, oyunboyu gərginlik yaşayan Ruslan Qurbanovla Riçard Qadze matçdan sonra bir birini vurdular. Deyilənlərə inansaq, Qadze oyun boyu qaradərili futbolçunun ünvanına təhqiramiz sözlər işlədib. Hətta “Zirə”nin baş məşqçisi Ayxan Abbasov milliləşdirilimiş Ruslan Qurbanovdan irqçiliyə son qoymağı xahiş edib. Amma futbolçu buna məhəl qoymayıb. Oyundan sonra isə bu hadisə daha bir neçə oyunçunu cənginə alıb. Urfan Abbasov və Sadio Tounkara da məsələyə girişib. Maraqlıdır kli, matçın baş hakimi Rauf Cabbarov heç bir oyunçuya qırmızı vərəqə göstərməyə macal tapmayıb. Hadisə paltardəyişmə otaqlarının önündə də davam edib. Bizdə olan məlumata görə, dəhlizdəki münaqişədə daha çox şəxs iştirak edib. Hadisə o dərəcədə şişib ki, məsələyə “Qəbələ”nin vitse-prezidenti Fariz Nəcəfov da müdaxilə edib. Bundan sonra “Zirə”nin baş məşqçisi Ayxan Abbasovu otağına dəvət edən Nəcəfov onunla xeyli söhbət edib. Futbol11.az saytının son məlumatına görə, “Zirə” artıq Qəbələni tərk edib. Hadisələrə isə hüquqi qiymət İntizam Komitəsinin növbəti iclasında veriləcək.(Futbol11.az)
