“Prosineçki ilə bağlı yeni xəbərdən məni dostlarım məlumatlandırdı. Bir daha deyirəm: Belə bir şey yoxdur. Tamamilə həqiqətdən uzaq söhbətdir. Türkiyədə bəzi qəzetçilər belə xəbərlər yayırlar”.
Korner.az-ın sportnet.az-a istinadən yaydığı xəbərə görə, bu sözləri Azərbaycan millisinin baş məşqçisi Robert Prosineçkinin meneceri Yaşar Çalışır deyib.
O, xorvatiyalı mütəxəssisin Türkiyə “Bursaspor”unun sükanı arxasına keçəcəyinə dair iddiaları qətiyyətlə təkzib edib. Menecerinin sözlərinə görə, hazırda Prosineçki və komandası Şimali İrlandiya ilə iyunun 10-da Bakıda keçiriləcək 2018-ci il dünya çempionatının seçmə qrup matçına hazırlaşır.
Çalışır Avstriyadakı təlim-məşq toplanışı zamanı “Bursaspor” rəsmilərinin baş məşqçi ilə yeni təklifləri müzakirə etmələrinin mümkünsüzlüyünü dilə gətirib.
O, İspaniya klubları ilə də hər hansı anlaşmanın olmadığını vurğulayıb: “Prosineçki nə “Sevilya”, nə də “Valensiya” ilə danışıqlar aparıb. Sadəcə, “Valensiya” rəsmisi məndən onu soruşub, vəssalam! Robertin “Real Madrid”in sükanı arxasına keçəcəyi nə qədər cılız iddiadırsa, “Bursaspor” və ya hər hansı klubun baş məşqçisi olacağı da o qədər yalandır. O, milli komandanın təlim-məşq toplanışı zamanı heç kiminlə görüşməz. Bu, qeyri-etikdir. Özü də heç yerə getmir, Bakıda qalacaq”.
