“Bakı-2015” ilk Avropa Oyunlarının batut gimnastikası üzrə kişilər arasında keçirilən finalında maraqlı hadisə yaşanıb.
Komanda yoldaşı Lukas Tomaşevski ilə batutda sıçrayan polşalı idmançı Hes Bartlomyej yerə enərkən səhvə yol verib və batutun üzərindən yıxılıb.
Bu zaman batut ətrafında dayanmış spotterlərdən biri Elçin Əlibəyov onun xəsarət almasının qarşısını alıb. Həmin anın görüntüləri qısa zamanda sosial şəbəkələrdə diqqət çəkib.
Əlibəyov açıqlamasında bildirdi ki, adının könüllü kimi hallanması düzgün deyil: “Əvvəlcə onu deyim ki, hamı könüllü olduğumu düşünür, ancaq mənim, eləcə də batut ətrafında dayanan digərlərinin vəzifəsi spotter adlanır. Spotterlər peşəkar idmançı və məşqçilərdən seçilirlər.
İdmançının düşmə anınıdan danışan Elçin sözlərinə belə davam etdi: “Hər kəsin keçirəcəyi hisslər deyildi, amma tam fərqli idi. Videodan göründüyü kimi idmançı mənə təşəkkür etdi. Daha sonra heç görüşmədik”.
Lukas Tomaşevski – Hes Bartlomyej cütlüyü sözügedən yarışda 10 600 xal toplayaraq sonuncu olublar. (DSport.Az)
