“Neftçi”nin hazırlıq planı bəlli oldu
07.06.2021 , 14:16
“Neftçi” klubunun 2021/2022-ci illər mövsümünə hazırlıq planı müəyyənləşib.
Korner.az klubun saytına istinadən xəbər verir ki, hazırlığın ilk mərhələsi iyunun 8-dən 14-dək Bakıda olacaq. “Ağ-qaralar” tibbi baxışdan keçəndən sonra məşqlərə başlayacaq və əsasən fiziki hazırlıq üzrə çalışacaq.
Taktiki və texniki çalışmalardan ibarət təlim-məşq toplanışının ikinci mərhələsi isə iyunun 16-dan 30-dək Sloveniyada olacaq. Ayın 15-də Türkiyənin İstanbul şəhərinə, orada bir gün qalandan sonra isə Sloveniyaya yollanacaq “ağ-qaralar” Kranyska Qora bölgəsində yerləşən “Ramada Hotel & Suites”də məskunlaşacaq.
“Neftçi” bu ölkədə 4 yoxlama görüşü keçirməyi planlaşdırır. Oyunlar iyunun 18-i, 22-si, 25-i və 29-da olacaq.
Azərbaycanı UEFA Çempionlar Liqasında təmsil edəcək “Neftçi”nin 1-ci təsnifat mərhələsindəki rəqibi iyunun 15-də keçiriləcək püşkatma mərasimində məlum olacaq.
