“Neftçi” şəhid ailələrini və qaziləri ziyarət etdi
30.12.2020 , 20:02
“Neftçi”nin rəhbərliyi, komandanın baş məşqçisi, kapitanı və azarkeşlər Azərbaycanın ərazi bütövlüyü uğrunda müharibədə həlak olmuş şəhidlərin əziz xatirəsini ehtiramla yad ediblər. İkinci Fəxri xiyabanı ziyarət edərək, məzarlar önünə klub adından əklil qoyublar.
Ardından “Neftçi” azarkeşlərindən şəhid olmuş mayor Rüfət Əsgərov, baş leytenant Teymur Məcidzadə və əsgər Afiq Qulamlının ailəsinə baş çəkilib, qazi Rafiq Əliyev və Cahid Şükürlü ziyarət edilib. Şəhidlərimizin ailəsinə başsağlığı verib, səbr diləyən klub rəsmiləri onların və qazilərin problem və qayğıları ilə də maraqlanıb. Bildirilib ki, “Neftçi” olaraq daima onların yanında olacaq, klub tərəfindən onlara hər cür dəstək göstəriləcək.
Allahdan bir daha bütün şəhidlərimizə rəhmət, yaralı qazilərimizə şəfa diləyirik!
