“Təlim-məşq toplanışının ilk mərhələsi futbolçuların fiziki göstəricilərinin yaxşılaşdırılmasına hesablanmışdı. İndi isə daha çox texniki-taktiki tapşırıqlara üstünlük veririk”.
Korner.az-ın məlumatına görə, bu sözləri “Neftçi”nin əvəzedici heyətinin baş məşqçisi Asim İbrahimov deyib.
Baş məşqçi AZAL-la yoxlama oyunu keçirəcəklərini bildirib : “Komanda gündə iki dəfə – saat 10.00 və 16.30-da məşqə çıxır. Yanvar 22-də AZAL-ın əvəzedici heyəti ilə yoxlama oyunu keçirəcəyik. Həmin qarşılaşmada aşağı yaş qruplarından dəvət etdiyimiz bir neçə futbolçunu da sınamaq niyyətindəyik. Özlərini yaxşı tərəfdən göstərənləri komandaya cəlb edəcəyik. Məqsədimiz əsas komandaya gənc yerli istedadlar hazırlamaqdı. Hazırda bir neçə futbolçumuz əsas komanda ilə birgə Türkiyədə hazırlıq keçir. Fikrimcə, bu futbolçular da yaxın gələcəkdə əsas heyətin üzvləri ilə rəqabət aparmaq gücündə olacaqlar”.
