Ölkə Premyer Liqasında qeyri-sabit çıxışına baxmayaraq, “Turan” turnir cədvəlində heç də pis yerdə qərarlaşmayıb. Əvvəllki illərdə olduğu kimi çempionluq yarışından xeyli uzaq görünsə də, 8-ci yer ötən mövsümün gedişində maliyyə sıxıntısı çəkən bir komanda üçün uğursuzluq sayılmamalıdı. Bu məqamda ötən mövsüm komandada vitse-president işləmiş Nail Nurəddinoğlundan keçmiş komandasının çıxışını dəyərləndirməsini istədik. Amma Topaz Premyer Liqasını izləmədiyini deyən keçmiş həmkarımız deyəsən, bu barədə danışmağa o qədər də həvəsli görünmür:
“Turan”la maraqlanmıram. Düzü çempionatı da yaxından izləmədiyim üçün bu barədə konkret bir söz deyə bilmərəm”.
Hər halda komandanın turnir cədvəlindəki mövqeyi barədə informasiya ilə keçmiş klub rəsmisinin mövqe bildirməsinə şərait yaratdıq: “Bu barədə çempionatın yekununda konkret dəyərləndirmə aparmaq olar, amma indi qərarlaşdığı yerə əsasən etiraf eləməliyəm ki, Ramin Musayev komandanı məndən daha yaxşı idarə edir”.
Nurəddinoğlunun Ramin Musayevin adını keçmiş komandası ilə yanaşı çəkməsinin kökündə nə dayandığını dəqiqləşdirə bilməsək də, bu cümlədə PFL rəhbərinin Tovuz təmsilçisi ilə yaxınlığına eyham vurduğu dəqiqdi.
Hər halda uzun müddətdi mətbutda görünməyən, hətta klubda işlədiyi dövrdə haqqında yazılan tənqidlərə belə reaksiya verməyən keçmiş həmkarımızın jurnalist fəaliyyəti dövründəkinin əksinə, artıq bildiklərini mətbuata daşımağa o qədər həvəsli olduğunu söyləmək olmur.
mundial.az
