Türkiyə milli komandasının və “Xəzər Lənkəran” futbol klubunun keçmiş baş məşqçisi Mustafa Dənizli iyunun 10-da Fransada start götürəcək Avropa çempionatında “ay-ulduzlular”ın şanslarını dəyərləndirib.
Korner.az-ın məlumatına görə, 67 yaşlı mütəxəssis “Report”un Türkiyə bürosuna açıqlamasında D qrupundakı bütün komandaların şanslarının bərabər olduğunu bildirib.
Onun sözlərinə görə, Türkiyə yığması 2002-ci il dünya çempionatı da daxil olmaqla, qatıldığı son 4 nüfuzlu yarışın 3-də uğurlu nəticələr qazanıb: “Millimiz 2000-ci il Avropa çempionatında 1/4 finala yüksəldi. 2002-ci il dünya və 2008-ci il qitə çempionatlarında yarımfinaladək irəliləyərək, bürünc medal qazandıq. Daha əvvəl komandamız 1996-cı ildə ilk dəfə Avropa çempionatına yüksəlmişdi. Bunları nəzərə aldıqda, Türkiyə güclü komanda təəssüratı yaradır. Düşünürəm ki, bu göstərici AVRO-2016-da da davam edəcək”.
M.Dənizli hesab edir ki, Türkiyənin rəqibləri budəfəki çempionatda ehtiyatlı davranacaqlar. Bu, xüsusən, Çexiya və Xorvatiyaya aiddir. Çünki onlar AVRO-2016-nın final mərhələsində qrupun son oyunu (2:3) və 1/4 final qarşılaşmasında (1:2) “ay-ulduzlular” üzərində qələbəni son anda əldən verərək, mübarizəni dayandırıblar: “Düşünürəm ki, hər iki rəqib bir az qisas hissi, bir az da əvvəlki illərin oyunlarını nəzərə alaraq, Türkiyə ilə ehtiyatlı davranacaqlar. 8 il öncə Çexiya və Xorvatiyanı son dəqiqələrdə məğlub etmişdik. Hesabda möhtəşəm bir geriyə dönüş olmuşdu. Onlar bunu yaxşı xatırlayırlar. Əslində komandamızın oyunçularını həm Türkiyə Super Liqasından, həm də Avropa kuboklarından da tanıyırlar”.
İspaniya yığmasına gəldikdə, sabiq baş məşqçi bildirib ki, son iki Avropa çempionatının finalçısı olmuş komandanı yenmək heç də çempionluğu hədəfləmək anlamı verməməlidir: “Çünki İspaniya əvvəlki gücündə deyil. Bu komandanın qrupdan daha yüksək mərhələlərədək irəliləyəcəyi belə mübahisəli məsələdir. Bir sözlə, maraqlı, həyəcanlı bir qrup olacaq”.
Sonda M.Dənizli Azərbaycan üçün çox darıxdığını bildirərək, ölkə futbolsevərlərinə sevgi və salamlarını göndərib.
Qeyd edək ki, Türkiyə millisi ilk oyununu iyunun 12-də Xorvatiyaya qarşı keçirəcək. İyunun 17-də rəqib İspaniya, iyunun 21-də isə Çexiya olacaq. Mustafa Dənizli “Xəzər Lənkəran”da 2013-cü il dekabrın 5-dən 2014-cü il mayın 16-dək, Türkiyə yığmasında isə 1996 – 2000-ci illərdə çalışıb. Onun son klubu 2015-ci il noyabrın 26-dan 2016-cı il martın 1-dək çalışdığı “Qalatasaray” olub.
