Milli komandamızın üzvü Cihan Özkara Almaniya mətbuatına müsahibə verib.
Korner.az həmin müsahibəni sizə təqdim edir.
– DÇ-2014-ün seçmə mərhələsi çərçivəsində Azərbaycan millisinin heyətində dünyanın ən güclü futbolçusu Kriştiano Ronaldoya qarşı oynamısan. Ona qarşı oyunda hər hansı həyəcan hiss etmədin ki?
– Oyundan öncə həyəcanlı idim. Sanki mədəmə ağrılar girmişdi. Bununla belə, Ronaldo ilə birgə meydanda olmaq böyük şərəfdi. Onun varlığı belə stadionda xüsusi atmosfer yaradırdı. Ancaq hakimin start fitindən sonra heç kəs onun barəsində düşünmürdü. Hər kəs öz oyununa köklənmişdi.
– Ronaldo ilə birbaşa təmasınız oldu?
– Bəs necə! Standart vəziyyətlərdə onu mən tutmalı idim. Bu isə fiziki güc tələb edir. Vəzifəm ona başla oynamaqda mane olmaq idi. Ronaldo fürsət düşən kimi, özünəməxsus driblinqlə irəli keçib, qol vurmağı bacaran oyunçudu. Düzdü, biz 0:3 hesabı ilə uduzduq. Ancaq Ronaldo qol vura bilmədi. Missiya yerinə yetirildi.
– 2013-cü il üçün “Qızıl top” səsverməsində Azərbaycan millisinin baş məşqçisi Berti Foqts Kriştianu Ronaldoya, kapitan Rəşad Sadıqov isə Frank Riberiyə üstünlük verib. Sizcə, kim düzgün seçim edib?
– Hər ikisi yüksək səviyyəli oyunçulardı. Ancaq bu dəfə Ronaldo layiq idi. Berti Foqtsla razılaşıram.
– Foqtsun özü də, vaxtilə dünya ulduzu olub. O, məşqçi kimi necədi?
– Foqts təkcə məşqçi deyil, həm də böyük insandır. Onunla işləməkdən həmişə qürur duyuram. Ona gör də, onun müqaviləsinin müddəti uzadıldığı üçün sevinirəm.
