Milli komandamızın və “Qarabağ”ın müdafiəçisi Qara Qarayev yığmamızın “Avro-2016”nın seçmə mərhələsində Malta ilə qarşılaşacağı oyun haqda sualları cavablandırıb
– Komandamız Malta ilə sonuncu dəfə 2013-cü ildə yoxlama oyununda qüvvəsini sınayıb və 3:0 hesablı qələbə qazanıb. Bu, millimizin üzvlərini arxayınlaşdıra bilər?
– Oyuna yüksək səviyyədə hazırlaşırıq. Əvvəlki qarşılaşmaların nəticəsi bizi maraqlandırmır. Artıq hər iki komanda daha fərqlidir. Bildiyimizə görə, Malta səfərdə yaxşı oynayır. Müdafiədə daha diqqətli olurlar. Ona görə də rəqiblərinə çətinlik yaradırlar. Məncə, 2013-cü ildəki Maltadan daha çətin bir yığma ilə qarşılaşacağıq.
– Rəqib haqda daha nə bilirsiniz?
– Daha çox müdafiədən oynayan, əks-hüumlara bel bağlayan komandadır. Bəzi məlumatları də Maltanın bu gün Gürcüstanla yoldaşlıq oyunundan sonra öyrənəcəyik. Bu görüşdən sonra rəqibi daha ətraflı analiz edə bilərik.
– Deməli, daha çox iş hücum xəttimizin üzərinə düşəcək?
– Sözsüz belədir. Ancaq müdafiəni də yaddan çıxarmamalıyıq. Qol buraxsaq, işimiz çətin olacaq. Qeyd etdiyim kimi, rəqib sıx müdafiə olunan komandadır. İlk növbədə qol buraxmamağı düşünməliyik.
– Onu da düşünürsünüzmü azarkeşlər növbəti xal itkisini qəbul etməyəcəklər?
– Bu məsələdə azarkeşlərin haqqı var. Ancaq futbolçularımızın əməyini də itirmək olmaz. Yəni biz əlimizdən gələni edəcəyik ki, qalib gələk və stadiona qələbə üçün glən azarkeşlərimizi sevindirək. Qalib gəlməsək belə, yaxşı oyun nümayiş etdirməliyik.
– Millimizin aparıcı futbolçularından olan Rauf Əliyev və Araz Abdullayev bu dəfə heyətdən kənarda qaldılar…
– Məncə, “Neftçi”də çıxış edən bəzi futbolçular milliyə layiq idi. Ancaq bu barədə qərarı baş məşqçimiz verir. Məni də milliyə dəvət etməyə bilərdi. Çünki yeni məşqçinin tam fərqli oyun fəlsəfəsi olur. İstər Araz, istərsə də Rauf baş məşqçinin bu addımına hörmətlə yanaşmalıdır.
– Yığmaya dəvət alan yeni futbolçular barədə nə deyə bilərsən?
– Onlardan bəziləri gənclərdir. Təbii ki, hamısı çox istəklidir. Məşqdə əzmlə çalışırlar. Bizim komandamıza da bunlar lazımdır. Onların komandaya necə faydalı olacağını zaman göstərəcək.
– Millimizə ilk dəfə dəvət alan “Qranada”nın hücumçusu Eddi İsrafilov özünü necə göstərir?
– İndidən konkret nəsə demək çətin olar. Amma çox həvəslə çalışdığını görürük. Bu həvəs komandamıza kömək olacaq.
Qol.Az
