Azərbaycan Topaz Premyer Liqası XVIII turunun "Inter"-"Bakı" qarşılaşmasını izləyənlər arasında "Atletiko" Madrid klubunun rəsmiləri də yer alırdı.
Korner.az "Bakı" klubunun rəsmi saytına istinadən xəbər verir ki, "Bakı" futbol klubunun prezidenti Hafiz Məmmədovun dəvəti ilə ölkəmizdə işgüzar səfərdə olan tərəfdaş klubun nümayəndələri komandanın oyununu "Şəfa" stadionunun tribunalarından seyr etdilər.
Oyundan sonra açıqlama verən Migel Angel Hil Marin olduqca maraqlı fikirlər səsləndirdi. "Atletiko" Madrid klubunun idarə heyətinin sədri komandasının oyun forması üzərində yer alan və böyük rezonans doğuraraq, gündəmdə aktuallığını itirməyən "Land of fire Azerbaijan" barədə açıqlama verdi:
"Yenidən Azərbaycanda və ölkənizin gözəl paytaxtında olmaqdan məmnunam. Hafiz Məmmədova təşəkkür edirəm ki, bizə bu qədər böyük diqqət və qayğı ilə yanaşır.
"Atletiko" Madrid və "Bakı" klubları böyük əməkdaşlıq müqaviləsin imza atıblar. Biz bu tərəfdaşlığın Azərbaycan futbolunun inkişafı üçün çox faydalı olacağına inanırıq.
Komandanın İspaniya liqası oyunlarına "Land of fire Azerbaijan" reklamı ilə çıxmasına aydınlıq gətirmək istəyirəm. Əməkdaşlıq barədə ilk müzakirələrimizdə "Bakı" futbol klubunun prezidenti Hafiz Məmmədov bu tərəfdaşlığın tək futbolla çərçivələnməsini deyil, ümumiyyətlə Azərbaycan və İspaniya xalqlarının dostluğuna xidmət etməsi arzularını ifadə etdi. Bu təklif böyük maraqla qarşılandl. Biz "Atletiko" Madrid olaraq, qədim və tarixi ənənələrə malik Azərbaycan tərəfi ilə əməkdaşlıqla fəxr edirik.
Bu ölkənin səmimi və mehriban insanlarına dərin hörmətlə yanaşırıq. Klublarımız və xalqlarımız arasında yaradılan bu körpüyə görə Hafiz Məmmədova təşəkkürümü bildirirəm.
Bildirmək istəyirəm ki, "Atletiko" Madrid oyun formaları üzərində "Land of fire Azerbaijan" yazısının yerləşdirilməsi ideyasının müəllifi özüməm. Hətta onu da əlavə edim ki, yazının məzmun və dizayn ideyası da mənim təxəyyülümün məhsuludur.
"Atletiko" Madrid klubu bu reklamın yerləşdirilməsi ilə ölkənizə və xalqınıza olan hörmət və ehtiramını ifadə edir. Bu fəaliyyət üçün klubumuza heç bir vəsait ödənilməyib və bu məsələ müzakirə mövzusu deyil.
"Land of fire Azerbaijan" "Atletiko" Madrid klubunun hədiyyəsidir. Biz iki klub arasında əməkdaşlığa geniş müstəvidən yanaşırıq. İnanıram ki, "Atletiko" və "Bakı" klubları arasında yaşanan hərtərəfli əməkdaşlıq Azərbaycan futbolunun inkişafında öz sözünü deyəcək".
Çıxışını bu sözlərlə tamamlayan Migel Angel Hil Marin alqışlar aıtında üzərində "Land of fire Azerbaijan" yazılan "Atletiko" formalarını "İnter" klubunun prezidenti Cahangir Hacıyev və "Bakı" klubunun prezidenti Hafiz Məmmədova təqdim etdi.
