.jpg)
"Neftçi"nin baş məşqçisi Böyükağa Hacıyev AZAL-la oyundan sonra keçirilən mətbuat konfransında maraqlı açıqlamalar verib.
Korner.az-ın məlumatına görə, "ağ-qaralar"ın 4:2 hesablı qələbəsi ilə başa çatan matçı şərh edən Hacıyev hakim Elçin Məmmədovun qərarlarından narazı qaldığını bildirib:
"Flavinyo niyə sarı kart almalıdı? Qarşıdan "İnter"lə oyun gəlir. Mən azərbaycanlıyam, azərbaycanlı məşqçiyəm. Mən oyun alqı-satqısına, danışılmış oyuna getmərəm. Azərbaycanda futbolunda gürcü sindiromu var. Heç kim buna qarşı çıxa bilmir. Ancaq heç bir azərbaycanlı məşqçi gedib Gürcüstanda bunları edə bilməz. Biz kimdən qorxuruq? Biri "Rəvan"a baş məşqçi gəlir və bilə-bilə komandanın heyətində 8-inci legioneri meydana buraxır. Bunlar hamısı Azərbaycanda baş verir. Mənim arzum budur ki, Azərbaycan futbolunda hər zaman sağlam rəqabət olsun. Hər kəs təmiz futbol oynasın, qoy ədalət zəfər çalsın".
B.Hacıyev daha sonra "İnter" – "Simurq" qardaşlığından danışaraq, onları bir-birlərinə xal verməkdə ittiham edib:
"Niyə toxunmuruq "İnter" və "Simurq" arasındakı qardaşlığa? İki gürcü məşqçi Azərbaycan futbolunda nə istəyir edir. Niyə? "İnter" "Simurq"a xal hədiyyə verir, "Simurq" "İnter"ə xal hədiyyə edir. Mən həmişə sağlam tənqidin tərəfdarı olmuşam. Lakin gəlin düzgün danışaq. Bu gürcü məşqçilər Azərbaycan futboluna nə verib? Mən 17 yaşlı Elşən Abdullayevi meydana buraxıram və bununla fəxr edirəm. İki ildən sonra eşidəcəksiniz ki, azərbaycanlı balası haralara gedib".
Paytaxt klubunun baş məşqçisi baş hakim Elçin Məmmədov tərəfindən tribunaya göndərilməsini belə izah etdi:
"Mən kimə neyləmişəm, bilmirəm. Mən həmişə demişəm məni öldürmək mümkündü, "sındırmaq" yox. Bundan sonra çalışacam ki, mən Azərbaycanla qurtarım".
Hacıyev daha sonra yenidən "İnter" və "Simurq"un bir-biri ilə olan bağlılığından danışdı:
"Gəlin keçmişə qayıdaq. "İnter" və "Simurq"da indiyə kimi azərbaycanlı baş məşqçi işləyibmi? Nədir bunların maraqı? Legioner futbolçular dəvət edirlər. Onlar gəlir və sonra da gedirlər".
