Ötən mövsüm Mahmud Qurbanovun rəhbərliyi altında elitada mübarizə aparan “Kəpəz”in Premyer Liqanı tərk etmişdi. Maddi imkanlarına görə digər çempionat iştirakçılarından geri qalan Gəncə təmsilçisinin real potensialı başqaları ilə rəqabət aparmağa imkan vermirdi. Birinci Divizionda çıxış edib-etməyəcəyi bir müddət bilinməyən gəncəlilərin nəhayət, aşağı liqada oynayacağı məlum oldu. Yeni prezident Mehman Allahverdiyev və yeni çalışdırıcı Vidadi Rzayevlə… İnsafən pis başlamadılar, qısa dönəmdə yığılan heyətlə sərgilənən inamlı oyun azarkeşləri ümidləndirdi. Ancaq sonradandurum yavaş-yavaş pisləşməyə başladı. Yenilgiləri sıralayan gəncəlilər son oyunda peşəkar futbolda ilk addımlarını atan, çempionata özündən də gec qoşulan “Mil-Muğan”a da uduzub (1:2) və turnir cədvəlində 8 xalla 16 komanda arasında 14-cü yerdə qərarlaşıb.
Bu barədə Gəncə futbolunun yetişdirdiyi ən istedadlı futbolçulardan olan Mahmud Qurbanovun fikirlərini öyrəndik: “Bir gəncəli kimi ürəyim yanır. Əlbəttə ki, “Kəpəz”i belə görmək istəməzdim. Gəncədə normal futbolçular var. İndi o komandada oynayan uşaqların çoxu elitada rəhbərliyim altında çıxış edib. Bilirəm ki, aşağı liqa üçün zəif deyillər. Amma komandanın içində olmadığımdan belə vəziyyətə düşmələrinin dəqiq səbəbini deyə bilmərəm”.
“Professor” ləqəbli futbolçudan “Kəpəz”dəkilərin onunla əlaqə saxlayıb-saxlamadıqlarını da soruşduq. Cavabında məsləhətləşmədiklərini vurğuladı: “Mənə zəng edən olmayıb. Hər hansı məsləhətləşmədən söhbət gedə bilməyib. Niyə? Nə bilim? Yəqin özlərini hər şeyi bilən sayırlar də. Reallıq budu ki, indiki futbolçularla bundan yaxşı nəticələr qazanmaq mümkündü”.
Yaxın keçmişdə ölkəyə “qaymaqlar” bəxş edən şəhərin Azərbaycanın futbol müstəvisində “çəki”sini itirmək üzrə olduğunu hamımız bilirik. Top qovduğu dönəmdə azarkeşlərin sevimlisinə çevrilən eks yarımmüdafiəçini dinləyək: “Orda yaxşı şərait yaradılmalıdı. Baza, stadion çatışmazlığı olmamalıdı ki, gənc oyunçular yetişsin. Bununla yanaşı, uşaqları futbola istiqamətləndirmək də vacibdi. Təəssüf ki, indiki uşaqlar futbolu məhəllələrdə yox, “pley steyşn”da oynamağa üstünlük verir”.
“Futbol+” qəzeti
