Kimin üçün futbol həyat tərzi, kimin üçünsə, sadəcə pul qazanmaq vasitəsidi. “Liverpul”un əfsanəvi məşqçisi Bill Şenkli, məhz bu mövzuda bunları demişdi:
“Bəziləri düşünür ki, futbol həyat və ölüm məsələsidi. Bu fikirlə razılaşanlara təəssüf edirəm. Çünki futbol daha çox, hətta lap çox önəmli məsələdi”.
Bu fikirlə bir çox azarkeş razılaşa bilər. Amma qəbul etməliyik ki, müasir futbol həm də pul qazanmağın ən optimal versiyalarındandı. Bizim oyunlarına heyrətlə baxdığımız futbolçular meydana çıxır və öz işlərini görüb pulunu qazanır. Təbii ki, onların həyatı təkcə meydan və topdan ibarət deyil. Hər bir futbolçunun stadiondankənar həyatda maraqlı və qeyri-adi məşğuliyyətləri var. Bu yazıda da məşhur futbolçuların qeyri-adi və maraqlı hobbiləri haqda danışacağıq.
1. Kriştiano Ronaldu
Yəqin ki, hər bir azarkeş, demək olar ki, bütün nominasiyalarda olan reytinqdə Ronaldunun adını görməyi adət edib. Portuqaliyalı ulduz bu siyahıdan da kənarda qalmayıb. “Real” Madridin hücumçusunun futboldan sonra ən sevimli məşğuliyyəti oxumaqdı. Onun bu bacarığına BURA-ya tıklamaqla baxa bilərsiz. Tez-tez sevdiyi mahnıları ifa edən Ronaldunun nə dərəcədə gözəl səsinin olmasını müəyyən etmək isə oxucuların ixtiyarındadı.
2. Yuriy Jirkov
Rusiya futbol tarixinin uğurlu futbolçularından biri Yuriy Jirkov tarixi çox sevir. İstedadlı futbolçu həm də kolleksionerdi. O, Böyük Vətən müharibəsinə aid bütün əşyaları toplayır. Bu barədə Jirkov özü açıqlamalarının birində deyib:
“Bir neçə gün öncə dostumun evində qonaq oldum. O, Böyük Vətən Müharibəsinə aid bütün əşyaları toplayırdı. Mənə də maraqlı gəldi və eyni işlə məşğul olmaq istədim. Yeni tikiləcək evimdə kiçik bir muzeyim olacaq. Kimin Vətən Müharibəsinə aid əşyaları varsa mənə verə bilər”
3. Petr Çex
“Arsenal”ın yeni futbolçusu Petr Çex də həmkarı Ronaldo kimi futboldan başqa musiqi ilə məşğul olur. Lakin çexiyalı Çex oxumağı deyil zərb alətlərində ifa etməyi xoşlayır. Özünün həvəskar rok qrupunu da yaradan təcrübəli qapıçı “YouTube”-da şəxsi kanalında öz ifalarını fanatları ilə bölüşür. Qapıçının bacarığına BURADAN baxa bilərsiz.
Keçmiş “zadəgan” həm də dünya ölkələrinin dillərini öyrənməyi sevir. O, fransız, ispan, portuqal, alman, slovak, ingilis dillərini yaxşı bilir. Yapon dilində bir neçə fraza, rus dilini isə elə də pis bilmir. Bununla bağlı Çex bunları deyib:
“Etiraf edirəm ki, xarici dilləri öyrənməyi çox sevirəm. Fərqli ölkələrə səfər edəndə insanlarla onların dilində münasibət qurmaq gözəldi. Amma bir sözü səhv deməkdən qorxuram. Yenə də, heç danışmamaqdan bu yaxşıdı. Çünki insanlar görür ki, ən azından danışmağa çalışıram və səhvlərimi düzəldirlər”.
4. Robin van Persi
“Fənərbağça”nın yeni transfer Robin van Persi stolüstü tennisdə çox iddialıdı. İdmanın bu növünü xoşlayan Robin yeni istedadını “Arsenal”da olarkən kəşf edib. Belə ki, “uçan hollandiyalı” “topçu” olanda bütün həmkarlarını məğlub edib. Komanda yoldaşları van Persinin bu idmanda çox yaxşı olduğunu iddia edib peşəkar tennisçi ilə oyun təşkil etdilər. Beləliklə, van Persi peşəkar stolüstü tennisçi Dairus Naytla matç keçirib (baxmaq üçün BURA tıklayın). Robin məğlub olsa da, rəqibi tərəfindən xoş sözlər qazandı:
“Van Persinin oyunu peşəkar olmayan biri üçün çox güclüdü. Onunla oyundan həzz aldım. Məncə, futbolu buraxsa, karyerasına yeni idman növündə başlaya bilər”.
5. Manuel Almuniya
“Arsenal”ın əsas qapıçısı olmuş Manuel Almuniyanın xüsusi bacarığı var. Hazırda “Uotford”un qapısını qoruyan Almuniya uşaq nağılları yazır. Almuniya bu hobbisi açıqlamalarının birində bildirmişdi. Lakin “əlcək sahibi” öz istedadına güvənmir. Təcrübəli futbolçu kitab nəşr edib onun yayılmasını istəmir.
Məmmədov İlkin
