Cari mövsümün startı əvvəlki illərdəkindən xeyli fərqlənir. Məsələn, ötən il hətta ikinci altılığın ən zəiflərindən olan “Simurq” bu gün liderdi. Avropa Liqasına vəsiqə qazanan “Xəzər Lənkəran” isə sonuncu pillədən dünən-srağagün qurtulub. Bunun adına inkişaf deyənlər də var, nəticələrin baş-ayaq olmasının altında başqa mətləblər axtaranlar da…
Amma nəticələr nə qədər kəlləmayallaq olsa da, proqnozsevərlər şakərlərindən əl çəkmirlər. Biz də dedik ki, oyunun nəticəsini əvvəlcədən hiss etmək xüsusi istedaddı. Xüsusi mükafatını almalı olan istedad. Və qərar verdik: əlimizdən gələni edib belə istedadları üzə çıxaraq və mükafatlandıraq.
Beləliklə, bu turdan etibarən Korner.az Premyer Liqa klubları ilə birlikdə proqnozsevərləri sevindirəcək. Şərtlərimiz? Çox sadədi. Hər turun açılış matçının keçiriləcəyi gündən bir gün əvvəl tərəfimizdən bir oyun seçiləcək və bu barədə saytın həm xəbər lentində, həm də feysbuk səhifəsində məlumat yerləşdiriləcək. Proqnozsevərlərə bir şey qalır: sayta daxil olmaqla həmin xəbərin, yaxud feysbuk səhifəmizdəki müvafiq statusun rəy bölməsinə oyunun necə bitəcəyinə dair təxminini yazmaq. Variantlardan yalnız ən tez və ən dəqiq göndərilən qalib elan ediləcək.
Qalibə nə təqdim olunacaq? Qoy bu da sürpriz qalsın…
Beləliklə, bu turdan seçdiyimiz oyun: “Sumqayıt" – “Rəvan”. Buyurun, bu xəbərin aşağısındakı və ya feysbuk səhifəmizdə bu yazının yer alacağı statusun rəy bölməsinə təxminlərinizi yazın. Vaxt getdi…
