Yeddi aydır təbliğat və seçimləri davam etdirilən FİFA U-17 qadınlararası dünya çempionatı Azərbaycan 2012-nin könüllüləri artıq ayrı-ayrı departamentlərlə görüşlərə başlayaraq, uyğun olaraq bölünüblər.
Korner.az-ın məlumatına görə, avqustun başlanması ilə könüllülərin treninqinə də start verilib. Bu dəfə isə marketinq departamenti öz könüllüləri ilə təlimlərə başlayıb.
Bu gün AFFA-nın konfrans zalında təşkil olunan təlimdə 130-a yaxın könüllü iştirak edib. Nəzəri təlimdə marketinq departamentinin direktoru Cavid Qarayev və mütəxəssislər iştirak ediblər. Görüşdə mütəxəssis Cəmilə Mehdiyeva könüllülərsiz çempionatın təşkilinin qeyri real olduğunu qeyd edib. Təlim zamanı çempionat müddətində müştərək işləyəcək könüllülərin həm bir-birini, həm də departament əməkdaşlarını yaxından tanımaq imkanı olub. Onlara görüləsi işlər, FİFA standartları, iş qaydaları barədə nəzəri məlumatlar verilib. Kiçik hədiyyələr və oyun cədvəli paylandıqdan sonra könüllülərlə növbəti treninqin də vaxtı dəqiqləşdirilib.
Qeyd edək ki, təlimlərin ikinci hissəsi stadionlarda, praktiki fəaliyyətlə davam etdiriləcək.
affa.az
