“Keşlə” Kamran Ağayevlə bağlı bəyanat yaydı: “Klub rəhbərliyi belə davranışı heç bir halda məqbul saymır”
17.12.2018 , 11:33
“Keşlə” klubu bəyanat yayıb.
Paytaxt təmsilçisi kapitanı Kamran Ağayevlə bağlı mətbuatda yayılan məlumata rəsmi münasibətini bildirib: “16.12.2018-ci il tarixdə futbol üzrə Azərbaycan Kubokunun 1/4 final mərhələsi çərçivəsində keçirilən “Qarabağ” – “Keşlə” matçından sonra komandamızın futbolçusu Kamran Ağayevin hakimlər otağına daxil olaraq müəyyən hərəkətlərə yol verməsi barədə bəzi elektron kütləvi informasiya vasitələrində həqiqətə uyğun olmayan məlumat yayılmışdı. Bildirmək istəyirik ki, Kamran Ağayev hakimlərə qarşı hər hansı bir qeyri-adekvat hərəkətə yol verməmişdir. O, oyun zamanı sarı vərəqə ilə cəzalandırılmış komanda yoldaşı haqqında doğru qərar qəbul etməsini hakimlər heyətindən xahiş etməyə çalışmışdı. Bu hadisə “Keşlə”nin Müşahidə Şurasının sədri və AFFA İcraiyyə Komitəsinin üzvü Zaur Axundovun diqqətindən yayınmamış və o, Kamran Ağayevdən hakimlər otağını dərhal tərk etməsini tələb etmişdi. Klub rəhbərliyi belə davranışı heç bir halda məqbul saymır. Nəzərinizə çatdırmaq istəyirik ki, klub rəhbərliyi xırda nöqsanlar istisna olmaqla “Qarabağ” – “Keşlə” matçının hakimlər heyətinin idarəçiliyi ilə bağlı ciddi narazılığı yoxdur və istənilən etirazın Əsasnamə qaydalarına uyğun ifadə edilməsinin tərəfdarıdı”.
Qeyd edək ki, Vüqar Həsənlinin baş hakimi olduğu qarşılaşma “Keşlə”nin 0:1 hesablı məğlubiyyəti ilə nəticələnib.
