"Kəpəz"in qapıçısı Ramil Kərimovun Korner.Az saytına müsahibəsi.
– Komandanızın I Diviziona düşməsi sizə necə təsir etdi?
– Açıq danışsaq, "Kəpəz"in durumu göz qabağında idi. Biz də istəməzdik belə olsun, ancaq təəssüf… Əlbəttə, bizim də səhvlərimiz oldu. "Kəpəz"in belə acınacaqlı vəziyyətdə Premyer Liqanı tərk etməsi bizim də adımıza ləkədi. Azərbaycan futbolu deyəndə çox zaman "Kəpəz" yada düşüb. Bu komandanın azarkeşləri Azərbaycanda bütün klublara nümunə olub. Ancaq əfsuzlar olsun ki, biz onları sevindirə bilmədik. Ancaq bizi də başa düşmək lazımdı. Kim istəyər ki, oynadığı komanda Birinci diviziona düşsün?
– "Kəpəz"in Premyer Liqanı tərk etməsi xəbərinin rəsmiləşməsi ardından Mahmud Qurbanov sizinlə söhbət etdi?
– Oturub xüsusi söhbət etməmişik. O da istəməzdi ki, belə olsun. Mahmud Qurbanov elə-belə futbolçu olmayıb, özünüz onu çox yaxşı tanıyırsız. Çox heyf ki, elə futbolçunun məşqçilik karyerası uğursuz başladı. Ancaq inşallah, davamı yaxşı olar. Ancaq ümid sonda ölür, gündə bir qərar çıxır. Bir də gördünüz dedilər, "Kəpəz" Birinci diviziona düşməyəcək. Ona görə ən yaxşısı may ayını gözləməkdi.
– Bəs bu hadisəni klub rəsmiləri necə qarşıladılar?
– Yəni onlar da istəməzdilər belə olsun.
– "Turan"la oyundan sonra baş məşqçi Mahmud Qurbanovla aranızda söz-söhbət olmuşdu, bu nə ilə bağlı idi?
– Mən bilmirəm bu söz-söhbətləri kim çıxarır. Orda heç nə baş verməmişdi, sadəcə olaraq baş məşqçimdi, üzümə səhvlərimi dedi, oldu, qurtardı-getdi. İkinci bir şeydən söhbət gedə bilməz. Mahmud müəllimlə münasibətimiz əvvəlki kimidi, heç nə dəyişilməyib.
– Yayda özünə klub axtaracaqsan, yoxsa Birinci divizionda oynamağa hazırsan?
– Əlbəttə ki, yayda özümə klub axtaracam. Çünki mən Birinci diviziondan Premyer Liqaya oynamaq üçün gəlmişəm. Yenidən ora qayıtmaq istəmirəm. Ancaq bu vəziyyətdə komandanı qoyub getmək kişilikdən olmazdı. Yayda müqavilə uzatmaq istəsələr, qalaram, çünki "Kəpəz"in çörəyini yemişəm. İnsan gərək yediyi qaba tüpürməsin. May ayı gəlsin, görək nə olur.
– Təkliflər aldığın klublar var?
– Hələ ki Birinci diviziondan bir təklif var. Başqa real təkliflər almamışam.
