"10 dekabr 2012-ci il, 2012/2013 mövsümündə, XXI Topaz Premyer Liqasının XVI turunun “Neftçi” – “Rəvan” matçının 76-cı dəqiqəsində “Rəvan” klubunun baş məşqçisi Kemal Alispahiç texniki zonana qaydalarını pozduğuna görə meydandan kənarlaşdırıldığı üçün 1 oyunluq cəzalanır, klub 1000 manat cərimə olunur (maddə 62).
Matçdan sonra keçirilən mətbuat konfransında “Rəvan” klubunun baş məşqçisi Kemal Alispahiç hakimin idarəçiliyi haqqında qeyri-etik ifadələr işlətdiyi üçün klub 2000 manat cərimə olunur (maddə 82)."
AFFA İntizam Komitəsinin hərdəmxəyal üzvlərinin çıxardıqları qərardan çıxarışdı bu. O Komitədə kimlər var, kimlər yoxdu – sirri-aləmdi. Bir sədri var ki, yazılanlardan xəbəri də olmaz. Hələ onu demirəm ki, iclasların çoxunda iştirak etməz. Üzvlər yığışar, qərarları yazıb çap edərlər, Fətullayev cənabları da imza atar və məsələ bitər.
Budu bunların işi. Ya "yuxarı"dan gələn sifarişi icra edərlər, ya da nümayəndələrinin raportuna yazılanlara uyğun hərəkət edərlər. Ta bunların "lal, kar, kor" nümayəndələrinin görmədiklərindən. eşitmədiklərindən mətbuat nə yazır – veclərinə olmaz. Soruşanda da deyirlər ki, AFFA nümayəndəsinin raportunda elə bir şey yox idi. Bəs Alisipahiçin dediklərini hardan götürdüz? Onu da nümayəndəniz yazmışdı raportuna?
Kemal Alisipahiç güclü məşqçidi, ya yox, bunu qoyuram bir tərəfə. Texniki zonanı tərk etdiyinə görə cərimə edilməsinə də bir söz demirəm – aşağıda hakimlə arasında olan söhbətdi. Amma adamın boynuna qoymaq ki, – mən də daxil olmaqla 10-a yaxın media nümayəndəsinin iştirakıyla keçirilən mətbuat konfransında – hakimlərimizin idarəçiliyi haqda qeyri-etik söz işlətmisən… Buna deyərlər həyadankəmlik.
Tənqid nə vaxtdan qeyri-etiklik olub? Adamın belini qırır hakimləriniz, hər oyunda penaltimiz verilmir deyir, nə etməlidi? Susub durmalıdı və siz – sifariş qulları deyilənlərin icrasıyla məşğul olmalısız?
Açın videoyazını, Alisipahiçin dediklərinə bir də baxın. Sonra gedin "qeyri-etiklik" nədi, araşdırın. Bir də, imkan olsa, həyanızın kəm-kəsirini düzəldin. Həyanın natamam olması çox pis şeydi çünki…
Saleh Arslan
