"Biz Zaqatalaya 3 xal qazanmaq üçün getmişdik və bu istəyimizə nail olduq. Baş məşqçimiz "Simurq"la qarşılaşmaya bizi yaxşı motivasiya etmişdi. Avrokuboklara düşməkçün qələbələr qazanmalıyıq. "Simurq"u çətin də olsa, məğlub edib, az da olsa istəyimizə nail olduğumuzu düşünürəm".
Bu sözləri Korner.az-a açıqlamasında "Bakı"nın gənc futbolçusu Şəhriyar Əliyev deyib.
"Zolaqlılar"ın müdafiəçisi qarşıdakı turda qarşılaşacaqları "İnter"lə oyun haqda da danışıb:
"İnter"lə oyunda da qələbə qazanmaq istəyirik. Bizim üçün digər komandaların hansı nəticələr qazandığı önəmli deyil. Çünki biz ardıcıl qələbə qazandıqca digər iddialılar da öz aralarında xal itirəcəklər. Çoxları fikirləşir ki, kubokda "İnter" bizə güzəştə getdi və bu oyunda onlara xal və ya xallar verəcəyik. Bu belə deyil. Tam səmimiyyətimlə deyirəm. Biz meydana "İnter"i məğlub etmək üçün çıxacağıq. "Simurq"la oyunda da hər kəs "Bakı"nın xal verəcəyini deyirdi. Lakin nəticə göz qabağındadı".
Əliyev "Bakı"nın avrokubok şanslarını dəyərləndirərkən bunları deyib:
"Təbii ki, turnir cədvələinə baxdıqda kubok qazanıb avrokubolara vəsiqə qazanmaq daha real görünür. Ancaq hər şey öz əlimizdədi. "Altılıq"da da sonadək mübarizə aparıb, sözümüzü demək istəyirik".
Səxavət QURBANOV
