Antalyada təlim-məşq toplanışı keçirən azərbaycanlı hakimlərin yanvarın 29-da idarə edəcəkləri qarşılaşmalar bəlli olub.
Korner.az-ın məlumatına görə, referilərimiz iki oyunda iş başında olacaqlar.
Anar Salmanovun rəhbərlik etdiyi briqada "Zenit" (Rusiya) – "Split" (Xorvatiya) matçında ədaləti qoruyacaq. Bakı vaxtıyla 19.00-da başlayacaq və Rusiya telekanalı vasitəsilə canlı yayımlanacaq görüşdə Salmanova Yaşar Abbasov-Zeynal Zeynalov cütlüyü yardım edəcək.
"Anji"nin əvəzediciləriylə Azərbaycanın 19 yaşadək futbolçulardan ibarət millisi arasında baş tutacaq oyuna da azərbaycanlı hakimlər təyinat alıblar. Matçın baş hakimi Etibar Həsənov olacaq. Ona Rail Ramazanovla İskəndər Əliyev yardım edəcək.
Bu, azərbaycanlı hakimlərin Antalyada idarə edəcəkləri son oyunlardı. Beləliklər, referilərimiz 15 günlük toplanış dövründə 50 oyunda ədalət prinsiplərini qorumuş oldular.
Qeyd edək ki, hakimlərimiz yanvarın 30-da toplanışı başa vuraraq Bakıya qayıdacaqlar.
Saleh Arslan
Antalya
