“Rəvan”ın baş məşqçisi Güvənc Kurtar eurosport.com-un Türkiyə bölməsinə müsahibə verib.
Korner.az müsahibəni sizə təqdim edir.
– Biz Azərbaycanı necə sevirsək, onlar da bizi sevirlər. Bunu Bunu o ölkənin hər metrində hiss etmək mümkündü. Futbolla bağlı danışsaq, təbii ki, önəmli olan orda uğur qazanmaqdı. Azərbaycan futbolunun inkişafına dəstək verəsək, bu bizim üçün xoşbəxtlik olar. Türkiyədə də fəlsəfəmiz bu idi. Orda da burdakı çalışma sistemimizlə fəaliyyət göstərəcəyik. Uğur qazanmaq üçün varıq.
– Orda yaşamaq çətindi? Azərbaycana alışmaq asandı?
– Azərbaycanla hər şeyimiz eynidi. Dilimiz, dinimiz eynidi. Yeməklərimiz bir-birinə bənzəyir. Heç bir problemimiz yoxdu. Türkiyə və ya Azərbaycanda olmağın fərqi yoxdu. Məqsədim Türkiyəni Azərbaycanda ən yaxşı şəkildə təmsil etməkdi.
– Komandada fəaliyyətə nə vaxt başladınız?
– Rəsmi olaraq bu ayın 5-dən məşqlərə başlamışam. İndi Antalyanın Lara bölgəsində toplanışdayıq.
– Türkiyədə uzun müddət komanda çalışdırmadınız. Təklif isə Azərbaycandan gəldi. Türk futbolundan incimisiniz?
– Mən Türkiyədə heç kimdən incik deyiləm. İndi işimiz Azərbaycandadı. Uğur qazanmaq üçün əlimdən gələni edəcəm.
– Mustafa Dənizli ilə görüşmüsünüz?
– Təəssüf ki, mümkün olmadı. Mən Azərbaycana gedəndə o, Türkiyəyə dönmüşdü. İndi çox çalışıram. Başımı qaşıyacaq vaxtım yoxdu.
– Deyəsən Mustafa Dənizli ilə kubokda mübarizə aparırsınız. Bir final gözləyə bilərik?
– Biz kubokun 1/4 finalındayıq. Azərbaycan Kubokunu qazanmaq istəyirik. Premyer Liqada vəziyyətimiz yaxşı deyil. Ancaq Mustafa Dənizlinin çalışdırdığı “Xəzər Lənkəran”la finalda qarşılaşa bilərik.
